Posted December 6, 2009 at 5:03 PM. by Rajesh Da Scorp in English films

The Untouchables (1987) – English

அல் கபோன் – இருபதாம் நூற்றாண்டின் தொடக்கத்தில், அமெரிக்காவைக் கலக்கிய ஒரு பெயர். சிகாகோவில் இருந்துகொண்டு, ஒரு மாபெரும் குற்ற சாம்ராஜ்யத்தை ஸ்தாபித்த ஒரு தாதா. இவனது ஆளுமையில் இல்லாத நபர்களே இல்லை என்று சொல்லும் அளவுக்கு, கிட்டத்தட்ட அரசாங்கத்தையே தனது கட்டுப்பாட்டில் வைத்திருந்த ஒரு ஆள். இன்றைய தாவூத், வரதராஜ முதலியார் போன்றவர்களின் முன்னோடி. இந்த மாபெரும் மலையோடு போரிட்டு, அதில் வெற்றியும் பெற்ற சில சாதாரண போலீஸ்காரர்களைப் பற்றிய படம்தான் ‘தி அன்டச்சபிள்ஸ்’. அந்தப் போலீஸ்காரர்களில் ஒருவரான எலியட் நெஸ் என்றவர் எழுதிய அவரது சுயசரிதையை மையமாக வைத்து 1987 -ல் எடுக்கப்பட்டது.

இப்படம் நிகழும் காலத்தில் – அதாவது 1920-1933 என்று வைத்துக்கொள்ளலாம் – அமெரிக்காவில் கடுமையான மதுவிலக்குச் சட்டம் அமுலில் இருந்தது. மதுவைத் தயாரிப்பதோ, விற்பதோ, உட்கொள்ளுவதோ, கடும் தண்டனையைப் பெற்றுத் தரும் குற்றங்கள். இந்தக் காலகட்டத்தில், மதுவையும் போதை மருந்துகளையும் பல கும்பல்கள் கடத்தி வந்து, சட்ட விரோதமான முறையில் விற்றன. அவற்றில் தலையாய கும்பல் தான் அல் கபோனின் கும்பல். இதனை எதிர்த்தவர்கள் எந்த ஈவு இரக்கமும் இன்றிக் கடுமையான முறையில் கொலை செய்யப்பட்டனர். அல் கபோனுக்கு அதிகார மட்டத்தில் பல இடங்களில் செல்வாக்கு இருந்ததால், அவனை யாராலும் ஒன்றும் செய்ய முடியவில்லை.

அல் கபோனின் கொட்டத்தை அடக்க, சில நேர்மையான அதிகாரிகள் எடுத்த முயற்சியின் விளைவாக, அரசாங்கக் கருவூல அதிகாரி ‘எலியட் நெஸ்’ என்பவரை நியமிக்கின்றனர். நெஸ்ஸும், அனைத்துப் போலீஸ் அதிகாரிகளையும் அழைத்து, ஒரு ‘உணர்ச்சிகரமான’ லெக்சர் அடித்து, ஒரு பெரும் படையைத் திரட்டிக்கொண்டு, அல் கபோனின் சரக்குக் கிட்டங்கியை சுற்றி வளைக்கிறார். ஆனால், அங்கிருக்கும் பெட்டிகளில், பொம்மைகளே இருக்கின்றன. அடுத்த நாள், செய்தித்தாள்களில், இவர் பொம்மைகள் அடங்கிய பெட்டிகளை உடைக்கும் புகைப்படம் வெளியாகி, பெருத்த அவமானத்துக்கு உள்ளாகிறார்.

இதனைப்பற்றி யோசித்துக்கொண்டே, வீட்டுக்குச் செல்லும் நெஸ், வழியில், ஒரு வயதான போலீஸ்காரரை சந்திக்கிறார். அந்தப் போலீஸ்காரர் – பெயர் – ஜிம்மி மலோன் – தனது நேர்மையைப் பற்றியும், அதனால் தனக்கு ஏற்படும் இன்னல்களைப் பற்றியும் – வருடக்கணக்கில் கான்ஸ்டபிளாகவே இருப்பவர் அவர் – நெஸ்ஸிடம் சொல்கிறார். அதனைக் கேட்டு, ஒன்றும் சொல்லாமல் கிளம்பும் நெஸ், அடுத்த நாள் மலோனைச் சந்தித்து, தனக்கு உதவ முடியுமா என்று கேட்கிறார். மிகவும் நேர்மையானவரும், சமூகவிரோதிகளைத் தண்டிக்கத் துடித்துக்கொண்டிருப்பவரும் ஆன மலோன், சந்தோஷமாக ஒப்புக்கொள்கிறார்.

மலோனின் ஆலோசனைப்படி, இளம் போலீஸ்காரர்களை உருவாக்கும் போலிஸ் அகாதெமிக்குச் சென்று, அங்கு பயிற்சி பெற்றுவரும் துடிப்பான இளை ஞன் ஜார்ஜைத் தேர்வுசெய்கிறார்கள் இவ்விருவரும். இவர்களுடன் ஒரு அக்கௌண்டண்டும் சேர்ந்துகொள்ள, உருவாகிறது ஒரு படை.

மலோன், நெஸ்ஸிடம், தனக்கு கபோனின் கிடங்கு இருக்குமிடம் தெரியும் என்று கூறி, இவர்களை ஒரு தபால் அலுவலகத்துக்கு அழைத்துச் செல்கிறார். அந்த அலுவலக நிலவறையில்தான் கபோனின் மதுக்கிடங்கு உள்ளது. அதன் வாயிலில் நின்று, கதவை உடைக்கப்போகும் முன், நெஸ்ஸிடம், “இந்தக் கதவை உடைத்துவிட்டால், பின்னர் நாம் திரும்பிப்பார்க்கவே முடியாது; இது ஒரு ஒருவழிப்பாதை மட்டுமே; எனவே நன்றாக யோசித்துச் சொல். இதை நீ செய்யத் தயாரா?” என்று மலோன் கேட்கிறார். நெஸ் சம்மதிக்கவே, கதவு உடைக்கப்பட்டு, அங்குள்ள அனைத்து சரக்குகளும் கையகப்படுத்தப்படுகின்றன.

அல் கபோனுக்கு இது முதல் அடி. மிகவும் கோபத்திற்குள்ளாகும் கபோன், நெஸ்ஸின் மனைவிக்கு மிரட்டல் விடுக்கிறார். எனவே, தனது மனைவியையும் மகளையும் ஒரு பாதுகாப்பான இடத்துக்கு அனுப்பி வைக்கும் நெஸ், கபோனை மடக்கத் தனது படையுடன் பல திட்டங்களை வகுக்கிறார்.

கபோன், அமெரிக்க – மெக்ஸிகோ எல்லையில் நடத்தவிருக்கும் ஒரு கடத்தல் வியாபாரம், இவர்களுக்குத் தெரியவருகிறது. அந்தக் கடத்தலை முறியடிக்கும் நெஸ், கபோனின் கும்பலில் முக்கியமான ஒரு கணக்காளரைப் பிடித்துவிடுகிறார். அப்ரூவராக மாற சம்மதிக்கும் அந்தக் கணக்காளரை, ஒரு பாதுகாப்பான இடத்தில் நெஸ் காவல் வைக்கிறார். ஆனால், கபோனின் கொலையாளி, அவனைக் கொன்றுவிடுகிறான். இதனால், கபோன் மேல் போடப்பட்டுள்ள கேஸ், கைவிடப்படும் நிலைக்கு வருகிறது.

மிகுந்த கோபமடையும் நெஸ், கபோன் இருக்குமிடம் சென்று, அவனுக்குச் சவால் விடுகிறார். அங்கு வரும் மலோன், நெஸ்ஸை அழைத்துச் சென்று, கேஸைத் தொடருமாறு சொல்லி, அதற்கான ஆதாரத்தைத் தான் கொண்டுவருவதாகச் சொல்கிறார். தனக்குள்ள தொடர்புகளின் மூலம், கபோனின் மற்றொரு கணக்காளரைப் பற்றித் தெரிந்துகொள்ளும் மலோன், நெஸ்ஸைத் தனது வீட்டுக்கு வருமாறு அழைக்கிறார்.

அதற்குள் மலோனின் கொலையாளி அவரைக் கத்தியால் குத்திவிடுகிறான். இறக்கும் தறுவாயில் உள்ள மலோன், நெஸ்ஸிடம் அந்தக் கணக்காளரைப் பற்றிச் சொல்லிவிட்டு உயிர் துறக்கிறார். அந்தக் கணக்காளரை மிகுந்த சிரமத்திற்குப் பின் பிடித்துவிடும் நெஸ், அவனைக் கோர்ட்டில் ஆஜர்படுத்தி, கபோன் சட்டவிரோதமாக சம்பாதித்ததைச் சொல்ல வைக்கிறார். எனினும், கபோன் மிகவும் சந்தோஷத்துடன் அமர்ந்திருக்கிறான். கபோனிடம் பேசிவிட்டுச் செல்லும் ஒரு ஆளைப் பிடிக்கும் நெஸ், அவன் சட்டவிரோதமாகத் துப்பாக்கி வைத்திருப்பதைக் கண்டுபிடிக்கிறார். அவன் தான் மலோனைக் கொன்றவன் என்று தெரிந்துகொள்ளும் நெஸ், அவனை மாடியிலிருந்து தள்ளி, கொன்று விடுகிறார்.

கபோன் ஜாலியாக அமர்ந்திருந்ததன் காரணம், அந்த ஜூரிகளையும் அவன் விலைக்கு வாங்கிவிட்டதுதான் என்று தெரிந்துகொள்ளும் நெஸ், சாதுர்யமாக நீதிபதியிடம் பேசி, ஜூரிகளை மாற்ற வைக்கிறார். கபோனை, வருமான வரி கட்டாத குற்றத்திற்காக (வேறு குற்றம் எதுவும் நிரூபிக்கப்படவில்லை), பதினோரு வருடங்கள் சிறையில் தள்ளுகிறார் நீதிபதி.

தனது கடமையில் வெற்றிபெறும் நெஸ், மிகவும் ரிலாக்ஸ்டாக வீட்டிற்கு நடந்து செல்கிறார். அத்துடன் படம் முடிகிறது.

நண்பர்களே.. இந்தக் கதையை முழுவதும் நான் எழுதிவிட்ட காரணம், இது என்னுடைய மிகப்பிடித்தமான படங்களில் ஒன்று. பல முறை பார்த்தாலும், சற்றும் சலிக்காத ஒரு படம் இது. நான் சொல்லாமல் விட்ட பல சுவாரஸ்யமான இடங்கள், படத்தில் உள்ளன. படு விறுவிறுப்பான திரைக்கதை, இதன் பிளஸ் பாயின்ட்டுகளில் ஒன்று.

மலோனாக பட்டையைக் கிளப்பிய ஷான் கான்னரிக்கு, சிறந்த துணை நடிகருக்கான ஆஸ்கார் விருது கிடைத்தது. நெஸ்ஸாக, ஹாலிவுட்டின் மிகச்சிறந்த நடிகர்களில் ஒருவரான கெவின் காஸ்ட்னர் (நம்ம தலைவர்!) நடித்தார். இதையெல்லாம் விட, அல் கபோனாக பின்னியெடுத்தது, ராபர்ட் டி நீரோ! ஒரு பயங்கரமான வில்லத்தனத்தை, மிக அமைதியான முறையில் வெளிப்படுத்தி, பின்னிப் பெடலெடுத்திருப்பார். அவரைப் பார்த்தாலேயே, நமக்குக் ‘கக்கா’ வந்துவிடும். டி நீரோவா கொக்கா? (கொசுறுத் தகவல் – இப்படத்திற்காக, கடுமையான ‘ஹோம் வொர்க்’ செய்த டி நீரோ, அண்டர்வேரைக் கூட, பழமையான மாடலாகப் பார்த்து தான் அணிந்து கொண்டாராம் – விக்கிபீடியா சொல்கிறது).

இதனை இயக்கியவர், மற்றொரு ஜாம்பவானான பிரயன் டி பா(ல்)மா.

மொத்தத்தில், ஹாலிவுட்டின் ‘ஹெவி வெய்ட்டுகள்’ இணைந்து மிரட்டிய இந்தப்படம், ஒரு பிரம்மாண்ட வெற்றியாக அமைந்தது. இன்றும், சற்று கூட போரே அடிக்காத இப்படம், ஹாலிவுட்டின் கிளாஸிக்குகளில் ஒன்று.

பி. கு – எப்படியாவது இப்படத்தைத் தமிழில் எடுத்தால், மலோனின் காரெக்டருக்கு மிகவும் பொருத்தமானவர் – வேறு யார்? நம்ம ரஜினி தான்!

இப்படத்தின் டிரைலருக்கு, இங்கே.