Posted January 16, 2010 at 6:23 AM. by Rajesh Da Scorp in English films

Eternal Sunshine of the Spotless Mind (2004) – English

காதலில் இருக்கும்போது, நாம் எத்தனைமுறை சண்டையிட்டிருக்கிறோம்? எவ்வளவோ சந்தோஷங்களைத் தரும் ஒரு இனிய அனுபவமாகக் காதல் இருந்தாலும், பல முறை, கசப்பான அனுபவங்களையும் தந்திருக்கிறது அல்லவா? அப்படிப்பட்ட ஒரு நிலையில், இரு காதலர்கள் என்ன செய்கிறார்கள்; அதனால் அவர்களுக்கு என்ன நேர்கிறது என்ற ஒரு மிக எளிமையான கருவை வைத்துப் பின்னப்பட்ட ஒரு அட்டகாசமான படம் தான் இந்த ‘Eternal Sunshine of the Spotless Mind’. இதுவும் ஒரு காதல் கதைதான். ஆனால், இதுவரை எடுக்கப்பட்டுள்ள காதல் கதைகளிலிருந்து முற்றிலும் வேறுபட்ட ஒரு அனுபவம் இது.

ஜோயல் (ஜிம் கேரி) ஒரு தனிமையான மனிதன். எப்பொழுதும் ஒருவித மென்சோகத்திலேயே வாழ்ந்துகொண்டிருப்பவனும் கூட. ஒரு காதலர் தினத்தன்று, தனிமையான ஒரு இடத்துக்கு (மாண்டாக்) அவன் செல்வதிலிருந்து படம் தொடங்குகிறது. அந்த இடத்தில், அவன் க்ளெமண்டைனை (கேட் வின்ஸ்லெட்) சந்திக்கிறான். அவளுமே அந்த ஆள் நடமாட்டமே இல்லாத இடத்தில் நின்று எதையோ யோசித்தவண்ணமே இருக்கிறாள். வலிய வந்து ஜோயலிடம் பேசி, தன்னை அறிமுகம் செய்து கொள்கிறாள். திரும்பச் செல்லும் வழியிலேயே, தனிமையான ஜோயலின் இதயத்தில் இடம் பிடித்து விடுகிறாள். வீட்டுக்கு வந்து, அவளைத் தொலைபேசியில் அழைக்கிறான் ஜோயல். அவள் அவனை, ஒரு உறைந்து போன ஏரிக்கு அழைத்துச் செல்கிறாள். இரவு முழுவதும் அங்கு இருந்து விட்டு, மறுநாள் ஜோயல், அவளை அவளது வீட்டில் ட்ராப் செய்கிறான். தான் மறுபடித் தூங்க விரும்புவதாகவும், தனது டூத்ப்ரஷ்ஷை எடுத்துவருவதாகவும் சொல்லிவிட்டு, க்ளெமண்டைன் அவளது வீட்டுக்குள் செல்கிறாள்.

காத்திருக்கும் ஜோயலின் கார்க்கண்ணாடி தட்டப்படுகிறது. ஒரு இளைஞன், “நீ இங்கு என்ன செய்து கொண்டிருக்கிறாய்?” என்று ஜோயலைக் கேட்கிறான். அவனுக்கு என்ன வேண்டும் என்று ஜோயல் திருப்பிக் கேட்க, அந்த இளைஞன் அங்கிருந்து சென்றுவிடுகிறான்.

அடுத்த காட்சியில், ஜோயல் விக்கி விக்கி அழுதுகொண்டிருக்கிறான். தனது நன்பனிடம் சென்று, க்ளெமண்டைன் தன்னை விட்டுவிட்டுச் சென்றுவிட்டதாகச் சொல்லிப் புலம்புகிறான். தான் அவளைக் காண, அவள் பணிபுரியும் இடத்துக்கே சென்றதாகவும், அவள், தன்னை ஒரு அந்நியனைப் பார்ப்பதைப் போல் பார்த்ததாகவும் சொல்கிறான். அவள் தன்னை வேண்டுமென்றே அவமதிப்பதாகச் சொல்லி அழுகிறான்.

அவனது நண்பன், ஜோயலிடம் ஒரு தபால் கார்டைக் கொடுக்கிறான். அந்தத் தபாலைப் படிக்கும் ஜோயல் அதிர்ச்சி அடைகிறான்.

இந்த இடத்தில் இருந்து, இப்படம் முற்றிலும் வேறான ஒரு தளத்தில் பயணிக்கத் தொடங்குகிறது. அதனைப் பற்றி நான் இங்கு எழுதினால், படத்தின் ரகசியத்தை உடைத்தது போல ஆகிவிடும் என்பதால், இந்த இடத்திலேயே இந்த விமரிசனத்தை நிறுத்திக்கொள்கிறேன்.

படம் நெடுக, ஜோயலுக்கும் க்ளெமண்டைனுக்கும் இடையேயான காதல் காட்சிகள் இடம்பெறுகின்றன. க்ளெமண்டைன் ஒரு அப்பட்டமான extravert. ஜோயலோ ஒரு முழுமையான introvert. இவர்கள் இடையே மலரும் காதல், இருவரின் மூலமாகவும் எப்படி வெளிப்படுகிறது என்பது அடுமையாகக் காட்டப்படுகிறது. க்ளெமண்டைன் ஒரு இரவில், வெகுநேரம் கழித்து, குடித்துவிட்டு வருகிறாள். அதனைப் பார்க்கும் ஜோயல், அவளைச் சந்தேகப்படுகிறான். அது க்ளெமண்டைனுக்குப் பிடிப்பதில்லை. க்ளெமண்டைன் எப்பொழுதும் உற்சாகத்துடன் இருக்கப் பிரியப்படுபவள். ஜோயலோ, எப்பொழுதுமே தனிமையில் இருக்க விருப்பப்படுபவன். எனவே, இருவருக்கும் சண்டை அடிக்கடி நேர்கிறது.

இந்தக் கதாபாத்திரத்தை, ஜிம் கேரியைவிட நன்றாக வேறு யாராவது செய்திருப்பார்களா என்பது சந்தேகம் தான். அவரது வழக்கமான சேஷ்டைகளை முற்றிலும் தவிர்த்துவிட்டு, நன்றாக நடித்திருக்கிறார். அதுவும், க்ளெமண்டைனை, அவள் சொல்வதற்கெல்லாம் குத்தலாகப் பதில் சொல்லும்போது, அங்கு நிற்பது ஜோயலேதான் என்ற பிரமை ஏற்படுகிறது. கேட் வின்ஸ்லெட், அழகான , சுதந்திரமான க்ளெமண்டைனை அருமையாகப் பிரதிபலித்திருக்கிறார். மிக அழகாக இருக்கிறார்.

இரண்டு காதலர்களுக்கும் இடையே நேர்கிற இந்த ஈகோ பிரச்னைகளை இப்படம் நேர்த்தியாகக் காட்டுகிறது. இதனைப் பார்க்கும் ஒவ்வொருவரும் , தங்களது வாழ்வில் இதைப் போல் நடந்த பிரச்னைகளை நினைவு கூரலாம்.

இப்படத்தில் நிறைய ஆச்சரியங்கள் இருக்கின்றன. நான் அவை எதையும் பற்றி எழுதப்போவதில்லை. நீங்களே பாருங்கள். ஒரு முற்றிலும் வித்தியாசமான அனுபவமாக இருக்கும் அது.