Posted March 15, 2010 at 11:07 AM. by Rajesh Da Scorp in Announcements, Romance

கருந்தேள், ஷ்ரீ மற்றும் யாஹூ . .

பத்தாண்டுகளுக்கு முன். வருடம் 2000. அவன் தனது இளங்கலைப் படிப்பை முடித்திருந்த காலம். அப்பொழுதுதான் இண்டெர்நெட் தனது வேர்களை இந்தியாவில் பரப்பிக்கொண்டிருந்த வேளை. ஒரு இரவு நேரம். கோவை. ஆர் எஸ் புரம். அவன், அப்பொழுதெல்லாம் விளையாட்டாய் யாஹூ சாட் அறைக்குச் சென்று, முகமறியாத பலருடன் பேசிக்கொண்டிருப்பான். அதில் அவனுக்கு ஒரு த்ரில். பல பேரை அவனே உருவாக்கியிருந்த போலி ஐடிக்களில் சென்று கலாய்ப்பதும் உண்டு. மிக விளையாட்டுத்தனமாகக் கழிந்த அந்த இரவுகளில் ஒரு இரவு.

நண்பனின் இண்டர்நெட் கடையில் அமர்ந்து, யாஹூவின் கோவை அறையில் உள்ள ஐடிக்களைப் பார்த்துக் கொண்டிருக்கிறான். அதில் ஒரு ஐடி மிக வித்தியாசமாக இருந்தது. அது ஆணா பெண்ணா என்றே கண்டுபிடிக்க இயலாமல். உடனே அதற்கு ஒரு மெஸேஜ் அனுப்பி வைத்தான். அடுத்த நொடியில் பதிலும் வந்தது. உடனே உற்சாகமானவன், சிறிது நேரம் அவளுடன் பேசிவிட்டு, அவலது தொலைபேசி எண்ணையும் வாங்கிக் கொண்டான்.

வெளியே வந்து, அந்த எண்ணுக்கு ஃபோன் செய்தான். மறுமுனையில் அந்தப் பெண். அத்தனை நேரம் தன்னை யாரோ கலாய்ப்பதாகவே எண்ணியிருந்தவன், அப்பொழுதுதான் தெளிவடைந்தான். இருவரும் சற்றுநேரம் பேசினர்.

அதன்பின் எப்பொழுது அவன் ஆன்லைன் வந்தாலும், அப்பெண்ணைத் தேடத் துவங்கினான். எப்பொழுதாவது அவள் இருப்பாள். ஓரிரு வார்த்தைகளில் முடித்துக்கொண்டு ஓடி விடுவாள். இருவருமே ஒருவரையொருவர் பார்த்ததில்லை.

இது இப்படியே ஓட, அவன் முதுகலை சேர்ந்தான். அவளும். அவள் முதுகலை முடித்துக் கொண்டு, பெங்களூரில் கணினி வேலைக்குச் சேர, அவன் கோவையிலேயே ஒரு கணினி நிறுவனத்தில் சேர்ந்தான்.

அந்த நிறுவனத்தின் மூலம் பெங்களூருக்கு ஒரு ட்ரைனிங்குக்காக அவன் செல்ல நேர்ந்தது. அப்பொழுதுதான் இருவரும் சந்தித்துக்கொண்டனர். முதல்முறையாக. அந்த நொடியே, வெல் . . கண்டதும் காதல். . அதன்பின், கஷ்டப்பட்டு அவனும் பெங்களூருக்கு வந்து விட்டான்.

இந்த நேரத்தில், இரு வீட்டாரிடமும் விஷயத்தைச் சொல்லி, அவர்களின் சம்மதமும் பெற்றுவிட, திருமணம் இதோ இந்த வார இறுதியில், கோவையில், வடவள்ளி சங்கரநாராயணா மஹாலில்.

21 மார்ச் –ஞாயிற்றுக்கிழமை மாலையில் வரவேற்பு. 22 மார்ச் – திங்கட்கிழமை காலை திருமணம்.

அவன் – கருந்தேளாகிய நான் – ராஜேஷ்.

அவள் – ஷ்ரீவாணி (ஸ்ரீவாணி என்று தான் குறிப்பிட்டிருக்க வேண்டும். ஆனால், அவளுக்கு ஷ்ரீ என்று அழைத்தால் தான் பிடிக்கிறது).

எனவே, அனைத்து நண்பர்களும் வந்து, இத்திருமணத்தை நடத்திக் கொடுக்குமாறு கேட்டுக் கொள்கிறேன்.

திருமணத்தன்று காலை, 22ஆம் தேதி, எனக்கும் ஷ்ரீ வாணிக்கும் நெருங்கிய நண்பர், நமது அன்பிற்குரிய சாரு நிவேதிதா கலந்து கொள்கிறார்.

அழைப்பிதழ் இதோ . .