Posted April 22, 2010 at 7:21 AM. by Rajesh Da Scorp in English films

Thelma & Louise (1991) – English

ஆங்கிலப்படங்களில், திரைக்கதை ஒரு முக்கியமான அம்சம். அங்கு ஒரு படம் தொடங்கும்போது, திரைக்கதை முழுதாக எழுதப்பட்டு, அனைத்து நடிகர்களுக்கும் அளிக்கப்படவேண்டும் என்பது அவசியம். இந்தத் திரைக்கதையில் மன்னர்கள் அங்கு பல பேர் உண்டு. திரைக்கதை எழுதுவதற்கென்றே பிரத்யேகமாகப் பயிற்சி பெற்று, அதை மட்டுமே செய்பவர்கள் அவர்கள். அங்கு இதைப்போன்று முக்கிய விஷயங்களில் கவனம் செலுத்துவதால், ஒரு மொக்கைப் படத்தில் கூட, திரைக்கதை உத்திகளை அவர்கள் அருமையாகப் புகுத்தியிருப்பார்கள்.

அமெரிக்காவின் திரைக்கதை மேதை என்று அழைக்கப்படுபவர், சிட் ஃபீல்ட். ஏறத்தாழ 20 வருடங்கள், திரைக்கதை தரம்பிரிக்கும் பணியில் ஈடுபட்டிருந்தவர். இதனாலேயே, ஒரு திரைக்கதையின் முதல் சில பக்கங்களைப் புரட்டியவுடன், அத்திரைக்கதை தேறுமா தேறாதா என்பதைக் கச்சிதமாகக் கணிக்கும் திறமை கைவரப்பெற்றவர்.

இந்த சிட் ஃபீல்ட், ’திரைக்கதை எழுதுவது எப்படி?’என்று எழுதிய புத்தகம், ஹாலிவுட்டில் வசூல் சாதனை படைத்த ஒன்று. அவர் சரமாரியாக திரைக்கதை பற்றி எழுதிய பல புத்தகங்கள் அங்கு மெகா ஹிட். தமிழில், உயிர்மை வெளியிட்ட சுஜாதாவின் புத்தகமான, ‘திரைக்கதை எழுதுவது எப்படி?’ என்ற புத்தகமும், முற்றிலும் சிட் ஃபீல்டின் புத்தகத்தை அடியொற்றி எழுதப்பட்டதேயாகும். சுஜாதாவுமே இதனை அப்புத்தகத்தின் முன்னுரையில் குறிப்பிட்டிருப்பார்.

இவ்வளவு பெரிய பீடிகை ஏனெனில், அந்த சிட் ஃபீல்ட், ‘Four Screenplays’ என்று ஒரு மெகாஹிட் புத்தகத்தை எழுதினார். அதில், நான்கு திரைப்படங்களின் திரைக்கதையை எடுத்துக்கொண்டு, அக்குவேறு ஆணிவேறாக அப்படங்களை அலசியிருப்பார். திரைக்கதை எழுதுவதில் இண்ட்ரஸ்ட் உள்ள எவரும் இப்புத்தகத்தைப் படித்து இன்புறலாம். அனைத்து லேண்ட்மார்க் கடைகளிலும் கிடைக்கும். பெங்களூர் நண்பர்கள், இங்குள்ள ‘Blossoms’ கடையில், மிகச்சீப்பாக இப்புத்தகத்தைப் பெறலாம்.

இப்புத்தகத்தில், அவர் எடுத்துக்கொண்ட நான்கு படங்களாவன: ‘Dances with Wolves’, ‘Terminator 2 – Judgement Day’, Silence of the Lambs’ மற்றும் ‘Thelma & Louise’.

இந்தப் புத்தகத்தில் இடம்பெறும் அளவுக்கு இந்தத் தெல்மா & லுயீஸ் படத்தில் என்ன இருக்கிறது? அப்புடி என்ன படம்யா அது? என்று கேட்டால், வெல்.. இதோ பார்த்துவிடுவோம்.

தெல்மா & லுயீஸ், 1991ல் , ரிட்லி ஸ்காட் இயக்கத்தில் வெளியான படம். சூசன் சராண்டன் மற்றும் ஜீனா டேவிஸ் பிரதான பாத்திரத்தில் நடிக்க, ஹாலிவுட்டின் எம் ஆர் ராதா ஹார்வி கீட்டல் மற்றும் மைக்கேல் மேட்சன், ப்ராட் பிட் ஆகியவர்களும் உடன் நடித்த ஒரு படம்.

இதன் திரைக்கதையை எழுதியவர், Callie Khouri. ஒரு பெண்மணி. இவரது முதல் திரைக்கதையே இதுதான். அதிலேயே, சிறந்த திரைக்கதைக்கான ஆஸ்கர் வென்றவர்.

ரைட்டு. படத்தின் துவக்கத்தில், நாம் தெல்மா மற்றும் லுயீஸைச் சந்திக்கிறோம். தெல்மா (ஜீனா டேவிஸ்), ஒரு இளிச்சவாய், சோம்பேறியான பெண். ஒரு கொடுங்கோல் கணவனுடன் காலம் தள்ளும் பெண். லுயீஸ் (சூசன் சராண்டன்), ஒரு வெயிட்ரஸ். இரும்பு மனம் கொண்ட பெண்மணி. இருவரும் ஓர் நாள், தங்கள் ஜோடிகளுக்குத் தெரியாமல், ஒரு அட்வென்ச்சர் ரைட் செல்வதிலிருந்து படம் துவங்குகிறது.

இரண்டு நாட்களில் திரும்பிவிடலாம் என்று அவர்கள் போட்ட பிளான், முழுமையாகத் திசைமாறுகிறது. வழியில் சில்வர் புல்லட் என்ற பாரில் சற்றுநேரம் இளைப்பாற நினைக்கும் இருவரும், ஹார்லான் என்பவனைச் சந்திக்க நேரிடுகிறது. அவனோ, அப்பாவியான தெல்மாவைப் பேசியே மயக்கி, ஒரு சந்தர்ப்பத்தில் அவளைக் குடிக்க வைத்து, ரேப் செய்ய முயல்கிறான். அந்த அயனான சந்தர்ப்பத்தில் அங்கு வந்துவிடும் லுயீஸ், தெல்மாவின் பையில் இருக்கும் துப்பாக்கியை எடுத்து, அவனை மிரட்டி, தெல்மாவை விடுவிக்கிறாள்.

இருவரும் அங்கிருந்து செல்லும் நேரத்தில், ஹார்லான் சொல்லும் ஒரு வாக்கியம், அவர்கள் இருவரின் வாழ்க்கையையும் கண நேரத்தில் மாற்றி, திசைதிருப்பி விடுகிறது. கோபத்தில், ‘Suck my Dick’ என்று ஹார்லான் கத்த, லுயீஸ் அவனைச் சுட்டு விடுகிறாள்.

அங்கிருந்து உடனடியாக வெளியேறும் இருவரும், தங்கள் காரை எடுத்துக் கொண்டு பக்கத்து ஸ்டேட்டுக்குச் சென்றுவிடவேண்டும் என்று பறக்கின்றனர். இந்தக் கொலையை ஆராய வரும் போலீஸ் அதிகாரியான ஹால் ஸ்லோகோம்ப் (ஹார்வி கீட்டல்), தனக்குக் கிடைக்கும் சிறு தடயங்களிலிருந்து, இவர்கள் இருவர் தான் கொலையாளிகள் என்று கண்டுபிடித்து விடுகிறார்.

ஓடும் வழியில் ஒரு க்யூட் இளைஞனைச் சந்திக்கும் தெல்மா, அவனை விரும்பத்தொடங்கிவிடுகிறாள் (ப்ராட் பிட்).

மெல்ல மெல்ல போலீஸ் தங்களை நெருங்க, மெக்ஸிகோவுக்குச் சென்று விடவேண்டும் என்று விரும்பும் தெல்மா மற்றும் லுயீஸ் என்னவானார்கள் என்பதே மீதிக்கதை.

ஆரம்பம் முதல் இறுதிவரை, பட்டாசைப் பற்றவைத்ததுபோல் செல்லும் இந்தத் திரைக்கதை, மேலே சொன்ன புத்தகத்தில் சூப்பராக அலசப்பட்டிருக்கிறது. முடிந்தால், அந்த அலசலை, பிறிதொரு தருணத்தில் பார்க்கலாம்.

இரண்டு சாதாரணத் தோழிகள், தங்களுக்கு நடந்த ஒரு அநியாயத்தினால், ஃபுயூஜிடிவ்களாக மாறி, ஒட்டுமொத்த போலீஸ் துறையே அவர்களைத் துரத்தும் கொடுமை, மிக விறுவிறுப்பாகப் பதிவு செய்யப்பட்டிருக்கிறது இப்படத்தில்.

மிக மிக இளமையான ப்ராட் பிட்டை இப்படத்தில் பார்க்கலாம் (ஒரு காலத்தில் அஜீத் மிக மிக இளைத்தபோது, காமெடியாக இருந்தாரே, அதுபோல்). அவரது கேரியரின் தொடக்கம் இது. அதேபோல், சற்றே மேன்லியான ஹார்வி கீட்டலையும் இப்படத்தில் காணலாம்.

ஹார்வி கீட்டலைப் பற்றி ஒரு வரி: சமீபகாலமாக, அவரது படங்களை ஒவ்வொன்றாகப் பார்த்து வருகிறேன். அசல் எம் ஆர் ராதாவை ஆங்கிலத்தில் காண்பதுபோன்றே இருக்கிறது. என்னா நக்கல்! என்னா நகைச்சுவை ! இதற்கு ஒரு உதாரணம், பல்ப் ஃபிக்‌ஷன் மற்றும் க்ரைம்ஸ்ப்ரீ.

படத்தைப் பார்த்து இன்புறுங்கள்.

தெல்மா & லுயீஸ் படத்தின் டிரைலர் இங்கே.