Pirates of the Caribbean: On Stranger Tides (2011)–English

ஆதோ கீர்த்தனாரம்பத்திலே . . . ஒரு இருபத்தைந்து வருடங்கள் முன்னால், டிம் பவர்ஸ் என்பவர், வேலை மெனக்கெட்டு, ஒரு நாவல் எழுதியதிலிருந்து, இந்த பைரேட்ஸ் படத்தின் கதை ஆரம்பிக்கிறது. இளமையின் நீரூற்று என்னும் ஒரு ஊற்றைத் தேடிச் செல்வதே இந்த நாவலின் கதை. அதன்பின்னர், பவர்ஸ், வால்ட் டிஸ்னிக்கு அந்த நாவலை விற்றும் விட்டார். வழக்கப்படி, அக்கதையை, ஒரு திரைப்படமாக எடுக்க வால்ட் டிஸ்னி முடிவு செய்தது. பீரியட். அப்படிப் படமாக எடுக்கவேண்டுமென்றால், யாரைப் போட்டால் படம் விற்கும்? ஆரம்பி பைரேட்ஸ் ஸீரீஸின் அடுத்த பாகம். போடு ஜானி டெப்பை. தொடங்கு ஷூட்டிங்கை. இதிலிருந்து, முதல் மூன்று பாகங்களின் இயக்குநர் கோர் வெர்பின்ஸ்கி விலகிவிட்டதால், கட்டாயம் இந்தப் படம் மொக்கையைப் போடப்போகிறது என்றே எண்ணிக்கொண்டிருந்தேன். காரணம், மம்மி ஸீரீஸின் மூன்றாம் பாகத்தை ஆவலுடன் சென்று பார்த்து, கொலைவெறியோடு வீடு திரும்பிய அனுபவம் ஒன்று ஏற்கெனவே இருந்தது. அந்த மூன்றாம் பாகத்தில், ஸ்டீவன் ஸாம்மர்ஸ் இல்லாமல், ராப் கோஹன் இயக்கியிருந்தார். அது மட்டுமில்லாமல், இந்த வாரம் இதைக் கிழித்தோம்; அடுத்த வாரம் அதைக் கிழிப்போம் என்றெல்லாம் தனது ப்ளாக்கில் தொடர்ந்து எழுதி, எதிர்பார்ப்பை எகிறவைத்துக்கொண்டிருந்தார். ஆனால், அந்த மூன்றாம் பாகத்தைப் போல ஒரு மொக்கைக்கடியை நான் பார்த்துப் பல வருடங்களே ஆகியிருந்தன. எனவே, அதே அனுபவம், இந்தப் பைரேட்ஸ் நான்காம் பாகத்திலும் எனக்குக் கிடைத்துவிடும் என்று அஞ்சி, இந்தப் படத்தைப் புறக்கணிக்கலாம் என்று முடிவு செய்திருந்தபோதுதான், காதலரின் விமர்சனம் வந்தது. அதில் இப்படம் நன்றாக இருந்தது என்று அவர் சொல்லியிருந்தது, முதல் நம்பிக்கையை அளித்தது. ஏனெனில், காதலரின் டேஸ்ட்டும் எனது டேஸ்ட்டும் கிட்டத்தட்ட, பேரலல் ட்ராக்கில் பயணிப்பவை. அதேபோல், தோர் விமர்சனத்திற்குப் பின்னூட்டிய விஸ்வா, படத்தைக் கண்டிப்பாகப் பார்க்கலாம் என்ற நம்பிக்கையை அளித்திருந்தார். எனவே, வீட்டின் அருகில் இருக்கும் முகுந்தா தியேட்டருக்கு நேற்று இரவு சென்றோம்.

போன்ஸ் டி லியோன். இது, ஃப்ரெஞ்ச் சென்ட் அல்ல. புகழ்பெற்ற ஒரு ஸ்பானிஷ் கேப்டன். இளமையின் நீரூற்றைக் கண்டுபிடித்து, தனது வயதை இளமையாக்கிக்கொள்ளவேண்டும் என்று பலகாலம் அலைந்துதிரிந்தவர். இளமையின் நீரூற்றைக் கண்டுபிடிப்பதற்குப் பதிலாக, ஃப்ளோரிடாவைக் கண்டுபிடித்துத் தொலைத்துவிட்டார் என்று இவரைப்பற்றிய கதைகள் உண்டு. இந்தப் போன்ஸ் டி லியோன் தான், இப்படத்தின் மைய இழை. இக்கதை நடக்கும் காலத்திலிருந்து இருநூறு வருடங்களுக்குமுன் வாழ்ந்த இந்த போன்ஸ் டி லியோனிடம், இரண்டு கோப்பைகள் இருந்தன. இந்தக் கோப்பைகளினால், இளமையின் நீருற்றின் தண்ணீரை நிரப்பி, அதில் ஒரு கோப்பையில், கடல்கன்னி ஒன்றின் கண்ணீரை ஒரு சொட்டு கலந்து, அந்தக் கலவையை ஒரு மனிதன் குடித்தால், தனக்கு எதிரில் இருக்கும் இன்னொருவனின் வாழ்நாளில் எஞ்சியுள்ள வருடங்கள், இவனுக்குக் கிடைக்கும். ஒரே நிபந்தனை என்னவெனில், போன்ஸின் இன்னொரு கோப்பையில் நிரம்பியுள்ள தண்ணீரை அந்த இன்னொரு மனிதன் குடிக்க வேண்டும். நிகழ்காலம். லண்டனில், தனது பெயரை உபயோகப்படுத்தி, கப்பலில் ஆள்சேர்ப்பு வேலை செய்துகொண்டிருக்கும் ஒரு ஃப்ராடுப்பயலைப் பற்றிய தகவல் அறிந்து, அவனைக் கையும் களவுமாகப் பிடிப்பதற்குச் செல்கிறான் ஜாக் ஸ்பேரோ. அங்கு போய்ப் பார்த்தால், இந்தக் கில்லாடி வள்ளல் வேலையைச் செய்துகொண்டிருப்பது, அவனது முன்னாள் காதலி ஆஞ்சலிகா. இந்த இளமையின் நீரூற்றைக் கண்டுபிடிப்பதற்காக, ப்ளேக் பியர்ட் (கருந்தாடி) என்ற கொடூரமான கடல் கொள்ளையனின் கப்பலில் சேர்ந்து, தொலைந்துபோன அவனது மகளே ஆஞ்சலிகா என்று அவனை நம்பவைத்து (கடைசியில், இந்தப் பொய்யே உண்மையாகிவிடுகிறது என்பதைச் சொல்லவும் வேண்டுமா), அவனது மரணம், ஒற்றைக்கால் மனிதன் ஒருவனால் சீக்கிரம் நிகழப்போகிறது என்பதால், அவனை நீண்ட காலம் வாழவைக்க ஆஞ்சலிகா திட்டமிடும் விபரம் ஜாக்குக்குக் கிடைக்கிறது. இந்த சைக்கிள் கேப்பில், இங்கிலாந்தின் குண்டு மன்னர் ஜார்ஜ் பணித்ததன் பேரில், இதே இளமையின் நீரூற்றைத் தேடி, இங்கிலாந்தின் படையுடன் பயணம் மேற்கொள்வது, ஜாக்கின் பழைய எதிரியும், நமக்கெல்லாம் மிகவும் பரிச்சயமானவனுமான ஹெக்டார் பார்போஸா. இந்த இரண்டு அணியினரைத்தவிர, ஸ்பானியப் படை ஒன்றும், இந்த நீரூற்றை அழிப்பதற்காகச் சென்றுகொண்டிருக்கிறது.

ஆஞ்சலிகாவினால் கடத்தப்படும் ஜாக், ஆஞ்சலிகா சார்ந்துள்ள ’The Queen Anne’s Revenge’ என்ற கப்பலுக்குக் கொண்டுவரப்படுகிறான். ஜாக்குக்கு அந்த நீரூற்றின் இடம் தெரியுமாதலால், ஜாக்கை உயிருடன் வைத்திருக்கும் நிர்ப்பந்தம், கருந்தாடிக்கு. இப்படியாக, மூன்று அணிகள் ஒன்றையொன்று போட்டியிட்டுக்கொண்டு, இளமையின் நீரூற்றுக்குச் செல்கின்றன.

இதன்பின் என்ன ஆனது? கருந்தாடியினால் நீண்டகாலம் உயிர்வாழ முடிந்ததா? என்ற கேள்விகளுக்கு, 3டி திரையில் படத்தைப் பாருங்கள்.

படத்தின் ஆரம்பம் முதல், திரைக்கதையைத் தூக்கி நிறுத்துவது, ஜானி டெப்பின் சுவாரஸ்யமான நடிப்பே. ஜாக்காக இவர் திரையில் அறிமுகமாவதிலிருந்து, இறுதிக் காட்சிவரை, நமது உள்ளத்தைக் கொள்ளைகொண்டுவிடுகிறார். முந்தைய மூன்று பாகங்களிலாவது ஆர்லாண்டோ ப்ளூம் மற்றும் கெய்ரா நைட்லி ஆகிய இருவரும் இருந்ததால், ஜாக் இல்லாத காட்சிகளில், அவர்கள் கொஞ்சமாவது கதையைச் சுவாரஸ்யப்படுத்தினர். ஆனால், இப்படத்தில், வேறு யாருமே இல்லாத நிலையில், படத்தின் அத்தனை காட்சிகளிலும் (நம்ம ரஜினி படங்கள் போல), ஜாக் இருந்தே ஆகவேண்டிய நிர்ப்பந்தம். இருந்தாலும், அலுக்காமல் அவரது சேஷ்டைகளைப் பார்க்கமுடிகிறது. வழக்கமான ஜாக்கின் அத்தனை கோமாளித்தனங்களும் இதிலும் உண்டு. ஆங்கிலம் பேசும் வடிவேலு போலவே ஜாக் விடும் உதார்கள், படு காமெடி. இதில், ஒரு மிகச்சிறிய காட்சியில், ஜாக்கின் தந்தையும் வந்துபோகிறார்.

வில்லன் கருந்தாடியாக, இயான் மெக்‌ஷேன். இவர் வசனம் பேசும் பல காட்சிகளில், நம்மூர் பி.எஸ். வீரப்பாவை எனக்கு நினைவுபடுத்திக்கொண்டே இருந்தார். இருந்தாலும் கூட, இவரைப் பார்த்தால், பயம் வரவில்லை. ஒருவித நகைச்சுவை உணர்வே மிகுந்திருந்தது. கூடவே, பார்போஸாவாக, ஜெஃப்ரி ரஷ். முதல் பாகத்தில், பார்போஸாவைப் பார்த்தால் எப்படி டக்கராக இருந்ததோ, அதற்கு நேர் மாறாக, இதில் அவரைப் பார்த்தாலும் சிரிப்பு வந்தது. இரண்டாம் பாகத்தில் அறிமுகமான டேவி ஜோன்ஸ் (பில் நை), இந்த ஸீரீஸின் நிஜமான வில்லன் என்று சொல்லலாம். அந்த அளவு குரூரம், வேறு எந்த வில்லனாலும் இந்த ஸீரீஸில் காட்டப்படவில்லை. எனவே, இப்படத்திலும், சரியான வில்லன் கதாபாத்திரம் இல்லை. பீனலோபி க்ருஸுக்கு இதில் பெரிதான வேலை எதுவும் இல்லை. வழக்கமான ஜாலி ஹீரோயின் பாத்திரம் என்பதால், அவரைப்பற்றிச் சொல்ல ஏதுமில்லை. படத்தில், கடல் கன்னிகள் சம்மந்தப்பட்ட சில காட்சிகள் வருகின்றன. அவை, படு மொக்கை. கதைக்குச் சற்றும் சம்மந்தமில்லாத ஒரு ட்ராக்காக அது இருப்பதால், சுவாரஸ்யம் சிறிதும் அதில் இல்லை.

இவ்வளவு குறைபாடுகள் இருந்தபோதிலும், படம் போரடிக்காமல் சென்றது. படத்தின் இரண்டாம் பாதி, படு வேகம். முதல் பாதி, கொஞ்சம் தொய்வு. படத்தின் பிரம்மாதமான அம்சமாக எனக்குப் பட்டது, இதன் பின்னணி இசை. நமது ஹான்ஸ் ஸிம்மர். குறிப்பாக, கருந்தாடியின் கப்பல் அறிமுகமாகும் காட்சியில், அட்டகாசமான பின்னணி இசையை கவனியுங்கள். இதே இசை, படத்தின் பல இடங்களில் வருகிறது. படு கம்பீரமான கோர்வை இது. கவனித்துப் பாருங்கள்.

வழக்கமான பைரேட்ஸ் படங்களைப்போலவே, இதுவும் இம்மி பிசகாமல் எடுக்கப்பட்டிருப்பது நல்ல விஷயம். இயக்குநர் மாறினாலும், திரைக்கதையாசிரியர்கள் மாறாததால், படம் பரவாயில்லை. கட்டாயம், கேப்டன் ஜாக் ஸ்பாரோவுக்காக இதைப் பார்க்கலாம். படத்தில் 3டி தேவையேயில்லை என்பது நன்றாகப் புரிகிறது.

On Stranger Tides படத்தின் ட்ரெய்லர் இங்கே.

Facebook comments

comments