Posted August 25, 2012 at 7:40 PM. by Rajesh Da Scorp in Copies, Tamil cinema

தெய்வத்திருமகள்: காப்பிரைட் வழக்கு

ஹாய் ஃப்ரெண்ட்ஸ். தமிழில் சில மாதங்கள் முன் வெளிவந்த தெய்வத்திருமகள் திரைப்படம், I am Sam படத்தின் காப்பி என்பது அனைவருக்குமே தெரியும். அந்தப் படம் வெளிவந்தவுடன் ஹாலிவுட் பாலா, I am Sam படத்தின் தயாரிப்பாளர்களான New Line Cinemas நிறுவனத்தினருக்கு ஒரு மின்னஞ்சல் அனுப்பியிருந்தார் என்பதும் நண்பர்களுக்குத் தெரிந்திருக்கும். இப்போது இந்த செய்தியைப் பற்றிய அப்டேட் வந்திருக்கிறது.

எனது நண்பர் ஒருவருக்கு (ஹாலிவுட் பாலா அல்ல) அமெரிக்காவில் சில நண்பர்கள் உண்டு. அவர்கள் மூலம் நேரடியாக ந்யூலைன் நிறுவனத்தின் லீகல் அட்வைஸர்கள் குழுவில் இருக்கும் ஒரு சிலரை அந்த நண்பர் அணுகியிருக்கிறார். அப்போதுதான் அவருக்கு ஒரு தகவல் கிடைத்துள்ளது. என்னவெனில், தெய்வத்திருமகள் படத்தைத் தயாரித்த UTV நிறுவனத்தினரை ந்யூலைன் ஸ்டுடியோஸ் நேரடியாகவே தொடர்பு கொண்டு, இந்தக் காப்பியைப் பற்றிய பிரச்னையைக் கிளப்பியிருப்பதாகவும், யூடிவி நிறுவனம் உடனேயே ஒரு தொகையை நஷ்ட ஈடாக அளித்து இந்தப் பிரச்னையை சரிக்கட்டியதாகவும் தகவல் கிடைத்திருக்கிறது. இந்தத் தகவல், ந்யூலைன் நிறுவனத்தினரின் லீகல் அட்வைஸர் டீமில் இருந்தே எனது நண்பருக்கு வந்திருக்கிறது. மின்னஞ்சலில் அல்ல. நேரடியாக அவர்களிடம் தொலைபேசியில் எனது நண்பர் பேசியபோது அவர்களே தெரிவித்த தகவல் இது.

இப்போது ஒரு சந்தேகம் எழக்கூடும். இந்தத் தகவல் பொய்யா உண்மையா? ஏன் வேண்டுமென்றே நான் இப்படி ஒரு தகவலை இட்டுக்கட்டி எனது ப்லாக்கில் எழுதியிருக்கக்கூடாது? இதற்கு ஆதாரம் என்ன?
எந்தத் தகவலையும் இட்டுக்கட்டி இதுவரை நான் நமது வலைப்பூவில் எழுதியதில்லை. எனது நண்பர் ந்யூலைன் லீகல் அட்வைஸர்களிடம் அவரது நண்பர்களை வைத்துப் பேசிய செய்தியே இது. இதற்கு இதுவரை அதிகாரபூர்வமாக எந்த ஆதாரமும் இல்லைதான். இதுவும் உண்மையே. அவர் என்னிடம் சொல்லிய தகவல் மட்டுமே ஆதாரம். அவர் பொய் சொல்லக்கூடிய நிலையில் இல்லை.
ஆனால், 2011 ஜூலையிலேயே இந்த நஷ்ட ஈட்டுச் செய்தி ஒரு வலைப்பூவில் வந்திருக்கிறது. அந்த வலைப்பூ எழுதிய நண்பர் யார் என்றே எனக்கு இன்றுவரை தெரியாது. மிக சமீபத்தில்தான் எனது நண்பர் இந்த வலைப்பூவை எனக்கு அனுப்பியும் வைத்திருக்கிறார்.

அந்த வலைப்பூ செய்தி இங்கே க்ளிக் செய்து படிக்கலாம்.

தெய்வத்திருமகள் மறைக்கப்பட்ட வழக்கு !!

ஒருவேளை இந்தச் செய்தி உண்மை எனில், இது நமது காப்பியடித்தே ஒப்பேற்றும் தமிழ்த் திரையுலகிற்கு ஒரு பாடம் எனலாம். இனியாவது ஒரிஜினலாக சிந்தித்துப் படம் எடுக்க இது ஒரு ஆரம்பம் என்றும் சொல்லலாம். ஆகவே இது நல்ல விஷயம் தானே? மிக விரைவில் எனது நண்பரிடம் மேலும் பல தகவல்கள் சேகரித்து எழுத முயற்சிக்கிறேன்.

பி.கு -

1. காப்பிகளைப் பற்றி மின்னஞ்சல் அனுப்புவதில் இப்படியும் ஒரு நன்மை இருக்கத்தான் செய்கிறது. இந்த பதிவைப் படித்தால், தெய்வத்திருமகள் போஸ்ட் ப்ரொடக்‌ஷனில் இருக்கும்போதே நஷ்ட ஈட்டுக்காக அவர்களை ந்யூலைன் நிறுவனத்தினர் அணுகியதாக இருக்கிறது. ஆகவே நாங்கள் அனுப்பிய மின்னஞ்சல்களால் பயன் இல்லாமல் கூட இருக்கலாம். ஆனால், இந்த முயற்சி இனியும் சந்தோஷமாக தொடர இந்த செய்தி வழிவகுத்திருக்கிறது என்பேன். விரைவில் இதுபற்றிய புதிய தகவல்களுடன் வருகிறேன்.

2. காப்பிகளைப் பற்றிய மின்னஞ்சல் முயற்சிகளை கிண்டல் அடித்த சிலரை எனக்குத் தெரியும்.ஒருவேளை இந்தச் செய்தி உண்மையாக நிரூபிக்கப்பட்டால் (அதற்கான முயற்சியில்தான் ஈடுபட்டிருக்கிறேன்) அவர்களின் முகம் போகும் போக்கைப் பற்றி யோசித்தால் சிரிப்பே மிஞ்சுகிறது.