Broken Embraces (2009) – Spanish

by Karundhel Rajesh ,  November 18, 2010   world cinema

---

இதற்கு முன்னரே, பெத்ரோ அல்மதோவாரின் சில படங்களைப் பார்த்திருந்தும், அவற்றை எழுத அமரும்போதெல்லாம், எதாவது வந்து குறுக்கிடும். வேறு ஒரு படத்தைப் பார்க்க நேரும். அந்த ஜோரில், இந்தப் படம் பற்றி எழுத மறந்துவிடும். ஆனால் இம்முறை, எழுதியே தீரவேண்டும் என்ற நோக்கத்தில் இரவு பனிரண்டரைக்கு உட்கார்ந்து இதை அடித்துக் கொண்டிருக்கிறேன்.

நான் இதுவரை பார்த்த அல்மதோவாரின் படங்களிலெல்லாம், பொதுவான அம்சமாக இருந்தவை, மனித உணர்வுகளே. இந்த வகையில், இவரும் கிம் கி டுக்கும் ஒன்று எனலாம். ஆனால், இருவருக்குமான ஒப்பீடு, அத்துடன் முடிவடைந்துவிடுகிறது. கிம் கி டுக், பேரிரைச்சலோடு வழியில் இருக்கும் அத்தனையையும் கபளீகரம் செய்துகொண்டே நம்மை நோக்கி முன்னேறிவரும் சுழல்காற்று என்றால், அல்மதோவார், அமைதியான ஒரு பாலைவனத்தில் சுழன்று அடிக்கும் மணற்புயல் எனலாம். இரண்டிலுமே அழிவு நிச்சயம். ஆனால், கொடூரமான முறையில் அலறிக்கொண்டு அழியாமல், மணற்புயலின் அழகியலை ரசித்துக்கொண்டே மரணமடையலாம். இது அல்மதோவாரின் சிறப்பு (இருந்தாலும் எனக்கு அலறிக்கொண்டு சாகும் கிம் கி டுக் தான் பிடித்தமானவர்).

இந்தப் படம், எதை முன்வைக்கிறது? அளவுக்கு மீறிய பற்றுதல், தந்தையின் அன்புக்கு ஏங்கும் சிறுவனின் மனம், அளவுகடந்த காதலில் காமத்தைக் கரைக்கும் உயிர்கள் இப்படிப் பல விஷயங்கள் இதில் உள்ளன. இருந்தாலும், இவற்றுக்கு இடையே எந்தக் குழப்பங்களும் இல்லை.

மேட்டியோ ப்ளான்கோ, ஒரு பிரபல இயக்குநர். தற்போது ஹேரி கேய்ன் என்ற புனைப்பெயரில் வாழ்ந்துவருபவர். அவரது திரைக்கதைகள் அத்தனையையும் இதே புனைப்பெயரில் எழுதிவந்திருக்கிறார். கண்பார்வை அற்றவர். இவருடன் வாழ்வது, அவரது மேனேஜரான யூடித்தும், அவளது மகன் டியேகோவும். மேனேஜர் என்பதை விட, ஏஜண்ட் என்று எடுத்துக்கொள்ளலாம். அங்கெல்லாம், இப்படி ஒரு திரைக்கதையாசிரியருக்கோ அல்லது இயக்குநருக்கோ அல்லது வெற்றி பெற்ற செலிப்ரிட்டி யாராக இருந்தாலும் அவர்களுக்கு ஒரு ஏஜண்ட் இருப்பார். அவர் மூலமாகத்தான் இவரை நாம் தொடர்பு கொள்ள முடியும். ஆனால் நம்மூரில் மேனேஜர் என்றே அழைப்பது வழக்கமல்லவா? எனவே அப்படிச் சொன்னேன்.

ஒருநாள், தான் வேலை செய்துவரும் பப்பில், கடுமையான போதைமருந்து கலந்த கோக்கைக் குடிக்க நேரும் டியேகோ, கோமாவில் விழுந்துவிடுகிறான். அவனது தாய் யூடித், வேலைநிமித்தமாக வெளியூர் சென்றிருக்க, விஷயம் அறியும் ஹாரி, மருத்துவமனை வந்து டியேகோவுடன் தங்குகிறார். ஆறு மணி நேரங்கள் கழித்து விழித்தெழுகிறான் டியேகோ.

இதற்கு முன், இவருடன் வேலை செய்ய விரும்புவதாக, ரே எக்ஸ் என்ற ஒரு இயக்குநன் இவரது வீட்டுக்கு வருகிறான். ஆனால், அவனுடன் வேலை செய்ய விரும்பாத ஹாரி, அவனைத் திருப்பி அனுப்பிவிடுகிறார். இவனைப்பற்றிய உண்மையை, யூடித் ஹாரிக்குச் சொல்கிறாள். அன்றையதினம் இறந்துபோன பெரும் செல்வந்தர் எர்னெஸ்டோ மார்ட்டெல்லின் மகனே இந்த ரே என்பது ஹாரிக்குத் தெரியவருகிறது. தனது வீட்டுக்கு வரும் டியேகோவை, ஒரு பழைய புகைப்படத்தை எடுக்கச்சொல்லி, அதில் இருக்கும் இளவயது ரேவை அடையாளம் காட்டி, தனது பழைய வாழ்க்கையின் நிகழ்ச்சிகளை இவனிடம் சொல்லத்தொடங்குவதாக, ஃப்ளேஷ்பேக் ஆரம்பிக்கிறது.

1992 – மேட்ரிட். செல்வந்தர் எர்னெஸ்டோவைப் பார்க்கிறோம். அவரது காரியதரிசி, மாக்தலேனா. நோயில் விழும் அவளது தந்தைக்கு எல்லா உதவிகளும் எர்னெஸ்டோ செய்கிறார்.

1994. அதே மாக்தலேனா, இப்போது எர்னெஸ்டோவுடன் வாழ்ந்துவருகிறாள். திருமணம் செய்யாமல். அன்றைய காலத்தில் மிக வெற்றிகரமாக விளங்கும் இயக்குநர் மேட்டியோ ப்ளாங்கோவிடம் ஆடிஷன் செய்ய ஆசைப்பட்டு மாக்தலேனா வருகிறாள். அவரது புதிய படமான ஒரு நகைச்சுவைப் படத்தில் இப்படியாக அவள் தேர்வாகிறாள். அவளுக்கு நடிப்பில் ஆசை. மட்டுமல்லாமல், சில நாடகங்களிலும் நடித்திருக்கிறாள்.

இது, பணக்காரர் எர்னெஸ்டோவுக்குப் பிடிப்பதில்லை. வயதான அவர், இளவயது மாக்தலேனா மீது வைத்திருக்கும் அபரிமிதமான காமமும் ஆசையும், அவரை சந்தேகக் கடலில் அமிழ்த்துகிறது. எனவே, மாக்தலேனாவின் கூடவே இருக்கும்படித் தனது மகனான எர்னெஸ்டோ ஜூனியரை அனுப்புகிறார் (ரே எக்ஸ்). இவன், மாக்தலேனாவின் ஒவ்வொரு செயலையும் வீடியோ எடுத்து, தனது தந்தைக்குப் போட்டுக் காட்டுகிறான். உதட்டசைவை வைத்துப் பேசுவதைக் கண்டுபிடிக்கும் ஒரு பெண்ணை வைத்து, அவள் பேசும் அத்தனை விஷயங்களையும் பற்றி எர்னெஸ்டோ அறிகிறார்.

இந்த சமயத்தில் தான், இயக்குநர் ப்ளாங்கோவுக்கும் மாக்தலேனாவுக்கும் இடையே இருக்கும் ஈர்ப்பு நமக்குப் புரிகிறது. இருவரும் ஆவேசமாக உறவு கொள்வதைப் பார்க்கிறோம். இருவரும் ஒருவரையொருவர் வெறித்தனமாகக் காதலிக்கின்றனர். மெதுவாக இதனைப் புரிந்துகொள்ளும் எர்னெஸ்டோ, ஒருநாள் மாக்தலேனாவை அழைத்துக்கொண்டு வெளியூர் சென்றுவிடுகிறார். அங்கே, இரண்டு நாட்கள், அவளைத் தூங்கவே விடாமல், அவளுடன் வலுக்கட்டாயமாகப் பலமுறை உறவுகொள்கிறார். இது பிடிக்காத மாக்தலேனா, கழிவறையில் வாந்தியெடுத்தாலும், அவரது முன்னே, இது பிடிப்பது போல நடிக்கிறாள். இதனைப் பற்றி ப்ளாங்கோவிடம் அவள் பேசும் வீடியோவையும் எர்னெஸ்டோ பார்த்துவிடுகிறார்.

ப்ளாங்கோவின் வீட்டுக்குப் போய் வரும் மாக்தலேனாவின் வீடியோவும் எர்னெஸ்டோவுக்குப் போய்ச் சேர்கிறது. இது தெரிந்த மாக்தலேனா, எர்னெஸ்டோவுடன் இனி இருக்க இயலாது என்று சொல்லிக் கிளம்பும் வேளையில், எர்னெஸ்டோ செய்யும் சதியால், அவளது கால்கள் உடைகின்றன.

இதற்குப் பின் என்ன ஆனது? மாக்தலேனாவும் இயக்குநர் ப்ளாங்கோவும் சேர முடிந்ததா? ப்ளாங்கோ ஏன் கண்களை இழந்தார்? அவர் ஏன் தனது பெயரை ஹாரி கேய்ன் என்று மாற்றிக்கொண்டார்? படத்தில் காணுங்கள். இதுவரை சொன்னது, படத்தின் கொஞ்சக் கதையைத்தான்.

இப்படத்தில், மாக்தலேனாவுக்கும் ப்ளாங்கோவுக்கும் இடையே நிலவும் காமம் கலந்த காதலாகட்டும், எர்னெஸ்டோ மாக்தலேனா மீது வைத்திருக்கும் காமம் கலந்த ஆசையாகட்டும், இரண்டுமே மிகச்சரியான முறையில், இக்காட்சிகளைக் காட்டத்துவங்கும்போதே நமக்குப் புரிய வைத்துவிடுகிறார் அல்மதோவார். அதேபோல், படத்தில் பல இடங்களில், அட்டகாசமான உணர்ச்சிபூர்வமான ஷாட்களை வைத்திருக்கிறார். கவனிக்கவும் – ஷாட்கள். நீளமான காட்சிகள் அல்ல. இப்படத்தின் இன்னொரு முக்கிய அம்சம், எந்த முக்கியக் காட்சியிலும், இசை என்பது துளிக்கூட இல்லை. இது, படத்தின் கனத்தை அதிகரிக்கிறது. அதேபோல், இப்படத்தின் கதையில், மேலும் பல திடுக்கிட வைக்கும் அம்சங்கள் உண்டு. படத்தின் ஒரு கட்டத்தில், இது த்ரில்லரோ என்ற சந்தேகம் நமக்குள் எழுகிறது.

இப்படம் முழுதுமே, மிக மிக இயல்பாக, நமது கண் முன் விரியும் கதையாகவே இருக்கிறது. உதாரணம்: எர்னெஸ்டோ, மிகப்பெரும் பணக்காரராக இருப்பினும், அவருக்கு அடியாள் படை போன்ற அபத்தங்கள் எதுவும் இல்லை. முக்கால்வாசி, தனது செயல்களைத் தானே தான் செய்துகொள்கிறார். வில்லத்தனமான செயல்களாக இருந்தாலும் சரி. படம் நெடுகவும், நமது உள்ளத்தைத் திருகும் காட்சிகள் உண்டு. பிரம்மாண்டமான வயலின் கோரஸ் பின்னணி இசையுடன் அல்லாது, எந்த இசையுமே இல்லாமல் இக்காட்சிகள் விரிவதனால், நாமும் அவற்றுடன் ஒன்ற முடிகிறது.

மனித உயிர்களுக்குள் நிலவும் அன்பும், காதலும், இன்னபிற உணர்ச்சிகளும் அழகாகக் காண்பிக்கப்பட்ட படங்களில் இது தலையாய ஒன்று என்று சந்தேகமில்லாமல் சொல்வேன். அதேபோல், இப்படத்தில் கதாபாத்திரங்கள் எடுக்கும் முடிவுகளும், படு இயல்பாகவே உள்ளன. கதையை முழுதாகச் சொல்லாமல் இவற்றைப் பற்றி மேலும் எழுதுவது தகாது. ஆனால், கதையையும் சொல்லமாட்டேன். நீங்களே பார்த்துத் தெரிந்துகொள்ளவும்.

மொத்தத்தில், Broken Embraces, ஒரு அழகியல் அனுபவம்.

இப்படம், 2010 ஆண்டுக்கான கோல்டன் க்ளோப் விருதுகளுக்கு நாமிநேட் செய்யப்பட்டது, சிலருக்கு நினைவிருக்கலாம். மேலும், கான் பட விழா போன்ற பல விழாக்களில் இப்படம் திரையிடப்பட்டது. அல்மதோவார் படங்கள் அப்படித் திரையிடப்படவில்லை என்றால் தான் ஆச்சரியம்.

Broken Embraces படத்தின் ட்ரெய்லர் காண இங்கே க்ளிக்கவும்