Drag Me to Hell (2005) – English

by Karundhel Rajesh ,  December 1, 2009   English films

---

சாதாரணமாகவே நமக்குத் தனியாக இருக்கும்போது ஒரு கதவு திறந்து மூடினாலே போதும். ஜன்னிதான். அதுவும், இரவு நேரம் என்றால், பக்கத்தில் ஒரு துப்பாக்கியே இருந்தாலும், பயந்து சாகும் ஒரு கேரக்டர் நான். அப்படி இருக்கும்போது, பேய்ப்படம் பார்க்கவேண்டும் என்ற ஆசை வந்தபோதே நான் உஷாராகி இருக்க வேண்டும். பாழும் மனம் கிடந்து அடித்துக்கொண்டதால், சென்ற மாதம் முழுவதும் பேய்ப்படங்கள் தான். படம் பார்க்கும்போது, எல்லா விளக்குகளையும் அணைத்துவிட்டு வேறு (ஒரு வீறாப்பு தான்) பார்ப்பது வழக்கம். எனக்கு நேர் எதிரில் ஒரு ஜன்னல் – அதைத் திறந்து வேறு விட்டுவிடுவேன். பத்து மணிக்கு மேல், இரவில், அந்த ஜன்னலில் குளிர்காற்று பின்னியெடுக்கும்போது, அக்கம்பக்கத்தில் எல்லா விளக்குகளையும் அணைத்துவிட்ட பின், நம்ம ஃபிலிம்ஷோ ஆரம்பிக்கும். படம் ஓடிக்கொண்டிருக்கும்போது, அந்த ஜன்னலில் லேசாக நிழலாடினாலேயே, உள்ளுக்குள் பகீரென்று ஒரு பந்து கிளம்பி நெஞ்சை அடைக்கும்.

இவ்வளவு பெரிய முன்னோட்டம் ஏனென்றால், அப்படிப் பார்க்கும் படங்கள் தரமான இயக்குனர்களின் படமாக சிலசமயம் அமைந்து விடுவதுண்டு (The shining – ஒரு உதாரணம்). இந்த இயக்குநர்களுக்கு, படமெடுக்கும்போது அப்படி ஒரு குஷி கிளம்பிவிடுகிறது. அதுவும், பேய்ப்படம் எடுக்கும்போது, பொண்டாட்டியை நினைத்து எடுக்கிறார்களோ என்னமோ, ‘ஆத்தா ஆள வுடு’ என்று கத்தும் அளவு பயப்படுத்திவிடுகிறார்கள். அதிலும் குறிப்பாக, நம்ம ஊரில் செண்டி பட இயக்குநர், ரொமான்ஸ் பட இயக்குநர், மொக்க பட இயக்குநர் என்று இருப்பதுபோல், பேய்ப்படம் எடுத்து, பயமுறுத்தியே தீருவேண்டா கொய்யாலே என எடுப்பவர்கள் அங்கு அதிகம்.

குறிப்பாக, சாம் ரெய்மி.

தலைவர் முதன்முதலில் எடுத்த பேய்ப்படம், ஹாலிவுட்டில் தறிகெட்டு ஓடியது. அது வந்த புதிதில், நம்ம ஊரு பத்திரிகைகள் எல்லாம் அதனைப் பாராட்டி எழுதின. நான் பள்ளியில் படிக்கும்போது அதை வீடியோவில் பார்த்து, நண்பர்களிடம் பெருமையடித்துக்கொள்வது ஒரு கெத்து.எனக்குத் தெரிந்து அந்தப்படத்தைச் சிறு வயதில் பல முறை பார்த்திருக்கிறேன் (பயந்திருக்கிறேன் என்று படித்துக்கொள்ளவும்). நீங்களும் அதனைக் குறைந்தது ஒரு முறையாவது பார்த்திருப்பீர்கள். அது தான் ‘Evil Dead’. தலைவர் அந்தப்படத்தின் மூலமே, வாழ்நாள் புகழை அடைந்துவிட்டார். அதன் பாக்கி இரண்டு பாகங்களை எடுத்துவிட்டு, க்ரைம் த்ரில்லர்களையும், ரொமன்டிக் காமெடிகளையும் ஒரு கை பார்த்துவிட்டு, ஸ்பைடர்மேன் படங்களை எடுத்துவிட்டு, சற்று ரிலாக்ஸ் ஆனபின், பேக் இன் ஃபார்ம் ஆகி அவர் எடுத்த படம் தான் ‘Drag me to Hell’. படத்தின் செலவு வெறும் 30 மில்லியன். எடுத்த லாபமோ கிட்டத்தட்ட 80 மில்லியன்.

படத்தைப் போட்டது இரவு பத்து மணி. செம குளிரு. வழக்கப்படி, திறந்த ஜன்னல். மூடிய கதவுகள். தனிமை. இருட்டு. இதற்கெல்லாம் மேல், ஒரு சூப்பர் ஹெட் ஃபோன் வேறு.

படம் ஆரம்பித்தது. ஆரம்பத்தில் ஒரு பத்து நிமிடம், ‘Constantine’ போல் இருந்தது. சரி, தலைவரின் சரக்கு குறைந்துவிட்டது டோய் என எண்ணி சற்று அலட்சியமாக (ஒரு வீரத்துடன் ??!!) பார்க்க ஆரம்பித்தபோதுதான், சாம் ரெய்மியின் முத்திரைக்காட்சிகள் ஒவ்வொன்றாக வரத்தொடங்கின. அதன்பின், டரியல் ஆனவன் தான்!!

மிகச்சாதாரணமான ஒரு கதையைக்கூட இவ்வளவு திகிலாக எடுக்கமுடியும் என்பது சாம் ரெய்மியின் திறமை.

படத்தின் கதாநாயகி Christine ஒரு வங்கியில் பணிபுரியும் துடிப்பான பெண். துணை மேலாளர் பொறுப்பு கிடைப்பதில் இவளுக்கும் இன்னொரு ஆசாமிக்கும் போட்டி. இவள் செய்துகொடுத்த ஒரு லோன் ஒப்பந்தம் பட்டையைக் கிளப்பியதில், இவளுடைய பெயர் தான் லிஸ்டில் முதலில் இருக்கிறது. எப்படியும் பதவி கிடைத்துவிடும் என்ற சந்தோஷத்தில் இருக்கிறாள்.

அப்போது ஒரு நாள், ஒரு கிழவி அந்த வங்கிக்கு வருகிறாள். அவளுடைய வீடு ஜப்தி செய்யப்படும் தறுவாயில் இருக்கிறது. மெலும் சிறிது அவகாசம் வேண்டும் என்று இவளிடம் இறைஞ்சுகிறாள். முதலில் பரிதாபப்படும் க்ரிஸ்டி, மேலாளரிடம் பேசுகையில், அவர் இவளுடைய முடிவுக்கே விட்டுவிட, புதிய பொறுப்பு கிடைக்கவேண்டும் என்றால், தயவு தாட்சண்யம் இல்லாமல் முடிவெடுத்தால்தான் உண்டு என்று எண்ணிக்கொண்டு, கிழவியிடம் மறுத்துப்பேசி விடுகிறாள். கிழவி இவள் காலில் விழுந்து கெஞ்சியும், மறுத்து விடுகிறாள். கிழவி கோபத்தில் க்ரிஸ்டியைத் தாக்குகிறாள். செக்யூரிட்டிகளின் உதவியோடு, கிழவி பலவந்தமாக வெளியேற்றப்படுகிறாள்.

அன்று இரவு, யாருமற்ற பார்க்கிங்கில் காரை எடுக்க வரும் க்ரிஸ்டி, சற்று தூரத்தில், கிழவியின் கார் நிற்பதைப் பார்க்கிறாள். அதனுள் இருந்து, கிழவியின் மெல்லிய இருமல் சத்தம் மட்டும் கேட்கிறது. அவசரமாக ஓடிவரும் க்ரிஸ்டி, காரை எடுக்கிறாள்.

அப்போது. . . . . .

அதகளம் ஆரம்பம்! சாம் ரெய்மி, ‘எடுக்குறேண்டா ஒரு பேய்ப்படத்த ங்கொக்கமக்கா!’ என்று வரிந்துகட்டிக்கொண்டு களத்தில் குதித்திருக்கிறார். குறிப்பாக, அந்தக் கிழவி! லயன் காமிக்ஸில் ‘கறுப்புக்கிழவியின் கதைகள்’ என்று வெளியிடப்பட்ட பகுதியைக் காமிக்ஸ் ரசிகர்கள் படித்திருக்கலாம். அந்தக் கறுப்புக் கிழவியை நேரில் நிறுத்தினால், இப்படித்தான் இருக்கும்! கதிகலங்க வைக்கும் ஒரு மேக்கப்! தூக்கி வாரிப்போடும் இசை வேறு (Christopher Young – மற்றொரு திறமைசாலி). இவர்கள் எல்லாரும் சேர்ந்து, நம் வயிற்றைக் கலக்குவதைக் கச்சிதமாகச் செய்திருக்கிறார்கள்.

மொத்தத்தில், இது என்னை கதிகலங்க அடித்த ஒரு படம். பார்த்து விட்டு சொல்லுங்கள். பார்க்கும்போது, துணைக்கு யாராவது இருந்தால் நலம்.

டிஸ்கி:- இதைப்பார்த்துவிட்டு, ‘யோவ் கண்ணாயிரம்! ஒரு ம*ரும் இல்ல.. படம் ஒரு மொக்க’ என்று உங்களுக்குத் தோன்றினால், ‘ஹாரர் கொண்டான்’ என்ற பட்டம் உங்களுக்கு அளிக்கப்படும் . .:) மற்றபடி, ஒரு படத்தை யாராவது பாராட்டினால், அதைப் பார்க்கும்போது மொக்கையாகத் தோன்றுவது நம்ம தமிழனின் குணம் ? . . ஒருவேளை படம் பிடிக்கவில்லையென்றால், பொறுத்தருள்க.

ட்ரைலர் இங்கே