The Man From Earth (2007) – English

by Karundhel Rajesh ,  June 12, 2012   English films

---

பிரம்மாவைப் பற்றிய ஒரு சிறிய கணக்கு. எனதில்லை. அஃப்கோர்ஸ் நமது புராணங்களிலிருந்துதான்.

இவற்றின்படி நமது உலகத்தின் காலம், நான்கு யுகங்களாக பிரிக்கப்பட்டிருப்பது நமக்குத் தெரியும். க்ருத யுகம், த்ரேதா யுகம், த்வாபர யுகம் மற்றும் கலியுகம். இதன் வருடங்கள், reverse chronologyயின்படி எண்ணுவது சுலபம். கலியுகத்துக்கு 4,32,000 வருடங்கள். இதன் இரண்டு மடங்கான 8,64,000 வருடங்கள், அதற்கு முந்தைய த்வாபர யுகம். கலியுகத்தின் மூன்று மடங்கான 12,96,000 வருடங்கள் என்பது த்ரேதா யுகம். கலியுகத்தின் நான்கு மடங்கான 17,28,000 வருடங்கள் என்பது க்ருத யுகம். ஆகமொத்தம், இந்த நான்கும் சேர்ந்த 43,20,000 வருடங்கள் என்பது ஒரு சதுர்யுகம் எனப்படும். நாற்பத்து மூன்று லட்சத்து இருபதாயிரம் வருடங்கள். இந்த ஒரு சதுர்யுகத்தைப்போல் நூறு சதுர்யுகங்களை கற்பனை செய்துகொள்ளுங்கள். 43,20,000 X 100 = 43,20,00,000. இந்த நூறு சதுர்யுகங்களின் பெயர், ஒரு கல்பம் என்பது. இப்படிப்பட்ட ஒரு கல்பமாகிய 43,20,00,000 (நாற்பத்து மூன்று கோடியே இருபது லட்சம் வருடங்கள்) என்பது இந்த பிரம்மாவின் ஒரே ஒரு நாளின் பாதி. அதாவது பகல் பொழுது. இதே அளவு வருடங்கள், அவரது இரவு. ஆக, பிரம்மாவின் ஒரு நாள் என்பதில், மொத்தம் 86,40,00,000 (எண்பத்து ஆறு கோடியே நாற்பது லட்சம்) வருடங்கள் உள்ளன. கபர்தார்! இது ஒரே ஒரு நாள் மட்டுமே.

இதுபோன்று மொத்தம் நூறு வருடங்கள், பிரம்மா உயிர் வாழ்வாராம். இதுதான் பிரபஞ்சத்தின் ஆயுள் என்று புராணக்கதைகள் சொல்லும்.

இது என்னய்யா ஏதோ கதாகாலட்சேபமாக உள்ளதே என்று நினைக்கிறீர்களா? காரணம் இல்லாமல் இதை சொல்லமாட்டேன்.

நமது இந்திய புராணங்களிலும் சரி, பிற நாட்டுப் புராணங்களிலும் சரி, தற்காலத்தில் எழுதப்பட்ட கதைகளான Lord of the Rings ஆக இருந்தாலும் சரி, இவை எல்லாவற்றிலும் ஒரு common factor உள்ளதைப் பார்க்க முடியும். அதாவது, தேவர்கள். எல்லாரையும் விட அதிக சக்தியுடன், மிக அழகாகவும், சாகா வரத்துடனும், பற்பல ஆயுதங்களோடும் இவர்கள் சித்தரிக்கப்பட்டு வந்திருக்கின்றனர். இவர்களால் முடியாதது எதுவுமே இல்லை.

இதே புராணங்களில், கொடுமையான சாபங்கள் வாங்கியவர்களைப் பற்றிய கதைகளும் பரவலாக உள்ளன. கடவுளிடம் சாபம் பெற்று கல்லாக மாறியவர்கள், மரமாக மாறியவர்கள், மாயமாக மறைந்தவர்கள், உடலெங்கும் அழுகி நிணம் சொட்டும் உருவம் எடுத்தவர்கள் ஆகிய் உதாரணங்கள் நம்மூர் புராணங்களிலேயே நிறைய படிக்கலாம். அதேபோல், பிறநாட்டுப் புராணங்களிலும் உண்டு. இதைத்தவிர, வாழ்வின் கொடுமையான துயரங்களை முதுகில் சுமந்தபடி வாழும் துன்பியல் கதாபாத்திரங்களை உலக இலக்கியத்தின் பல பக்கங்களில் படிக்கலாம்.

பொதுவாக, மனித வாழ்வின் உச்சபட்ச துயரம் எது? நமது கண் முன்னர் நமது குழந்தைகள் மடிவதே. அதற்கு இணையாக இல்லாவிட்டாலும், ஓரளவு இதன் பக்கத்தில் வருவது, நமது கண் முன்னர் மனைவியோ கணவனோ மறைவது. பின்னர் பெற்றோர்கள் இறப்பது. இதன்பின் சொந்த பந்தங்கள் சாவது. எத்தகைய மனிதனாக இருந்தாலும் இது நடந்தே தீரும். அப்படித்தான் இயற்கை நியதி.

Anomaly என்று ஒரு வார்த்தை விஞ்ஞான உலகில் மிகப்பிரபலம். எந்த ஒரு நிர்ணயிக்கப்பட்ட விதியும், மிகச்சில தருணங்களில் பொய்க்க நேரலாம். அப்போது அத்தகைய மாற்றத்தை எது ஏற்படுத்துகிறதோ – அதாவது, ஏற்கனவே முடிவு செய்யப்பட்ட விஷயம் நடக்காமல் பொய்ப்பது – அப்போது, அந்த விஷயம் ஒரு அனாமலியாக மாறுகிறது. உதாரணம்: மேட்ரிக்ஸ் படத்தில் கதாநாயகன் நியோ ஒரு அனாமலி. எங்காவது பறக்கும் குதிரை இருந்தால் அது ஒரு அனாமலி. யாராவது நிஜமான சந்நியாசி வாழ்ந்து வந்தால் அவர் ஒரு அனாமலி. எந்த அரசியல்வாதியாவது தூய்மையாக வாழ்ந்தால் அவர் ஒரு அனாமலி. தமிழகத்தில் மின்சாரம் கட் செய்யப்படாமல் 24/7 ஒளிவெள்ளம் பாய்ந்தால் அது ஒரு அனாமலி. இப்படி பல அனாமலிகள் சொல்லலாம்.

பல மதங்களின் புராணங்களையும் பார்த்தால், ஏதோ ஒரு ஸ்தாபகர் இருந்ததாக படித்திருக்கிறோம். புத்தர், ஆதிசங்கரர், அல்லா, க்றிஸ்து, ஸொராஸ்த்ரர், இப்படிப் பலர். இந்த அத்தனை பேருக்கும் விசேஷ சக்திகள் இருந்ததாகவே இந்தக் கதைகள் தெரிவிக்கின்றன. இவர்கள் சாதாரண மனிதர்கள் அல்ல; கடவுள்களே இப்படி வந்தனர் என்று இவை சொல்லும். இப்போது, நேராக இவர்களின் காலத்துக்கு நாம் செல்கிறோம் என்று வைத்துக்கொள்ளலாம். அப்போது, இதோ தெரு முக்கில் நின்றுகொண்டு அந்தக்கால பானமாகிய டீயோ மூலிகைச்சாறோ சோமபானமோ குடித்துக்கொண்டிருக்கும் அந்த மனிதர்தான் வருங்காலத்தில் கடவுளாக வழிபடப்பெறப்போகும் நபர் என்பது அவருக்கே தெரியாமல் இருக்க ஆயிரம் மடங்கு வாய்ப்புகள் உண்டு, இன்னொரு உதாரணமாக: இதோ இந்தக் கட்டுரையின் வார்த்தைகளே இன்னும் இரண்டாயிரம் ஆண்டுகள் கழித்து எதாவது ஒரு புதிய மதத்தின் வேதமாக மாறலாம். இந்த வார்த்தைகளுக்கு யாராவது பக்கம் பக்கமாக விரிவுரை எழுதலாம் (வெட்டி மவனே..இருந்தாலும் இது ரொம்பவே ஓவரு). அட ஒரு உதாரணத்துக்கு சொன்னேம்பா..

கடவுள் இருக்கிறாரா இல்லையா?

பிரபஞ்சம் என்பது என்ன?

வாழ்க்கையின் உச்சபட்சத் துயரம் எது?

ரைட். முடித்துக்கொள்கிறேன்.

The Man From  Earth பாருங்கள். உங்களுக்குப் பிடிக்கும். திரைக்கதையில் என்னை அசர அடித்த படங்களில் இது ஒன்று.

பி.கு

• படத்தைப் பற்றி ஒரு வார்த்தை கூட எழுதாமல் ஒரு கட்டுரையே முடிக்கிறானே என்று எண்ணவேண்டாம். படத்தைப் பாருங்கள்.
• இந்தப் படம் என்னிடம் கிட்டத்தட்ட ஒரு வருடமாக இருந்தது. ஆனால் இன்றுதான் பார்க்கும் வாய்ப்பு கிட்டியது. அதற்காக நண்பர் அருண்குமார் மோஹன்ராஜுக்கு நன்றிகள். (இவர் என்னால் நேற்று Serbian Film பார்த்து ஆடிப்போயுள்ளார்).
• இத்தனை லோ பட்ஜெட்டில், இவ்வளவு குறைவான கதாபாத்திரங்களை வைத்துக்கொண்டு சிலம்பமே ஆடியிருக்கிறார்கள் இப்படத்தில்.