Hellboy

by Karundhel Rajesh ,  August 6, 2011   Comics Reviews

---

யானை பலம். எதற்கும் பயப்படாத தெனாவெட்டு. எப்போதும் கோபமாகவே இருக்கும் குணம். கையில், எதையும் பொடிப்பொடியாகும் பலம்வாய்ந்த துப்பாக்கி.

ஹெல்பாய்.

முதன்முதலில் இப்படியொரு படம் வருவதைக் கேள்விப்பட்ட நான், அச்சமயத்தில் , இது கட்டாயம் மொக்கையாகத்தான் இருக்கும் என்று நினைத்து, படத்தைப் பார்க்கவில்லை. ஆனால், அதன்பின் சில வருடங்கள் கழித்தே படத்தைப் பார்த்தேன். அட்டகாசமான action படங்களில் ஹெல்பாயும் ஒன்று என்று அறிந்தேன். ஹெல்பாய் சீரிஸில் இருக்கும் காமிக்ஸ்களை மொத்தமாகப் படித்துவருகிறேன். அவை என் உள்ளத்தைக் கொள்ளை கொண்டுவிட்டன. ஆகவேதான் இந்தக் கட்டுரை.

ஹெல்பாய் என்ற பெயருக்கு, ‘நரக மனிதன்’ அல்லது நரகச்சிறுவன் என்று பொருள் தோன்றுகிறது அல்லவா? ஹெல்பாய், நரகத்திலிருந்தே வந்து குதித்த ஒரு ஜந்து தான். எப்படி? இரண்டாம் உலகப்போரின் உக்கிரமான கடைசி நிமிடங்கள். எப்படியாவது நேச நாடுகளை வென்றுவிடவேண்டும் என்ற வெறியுடன் ஹிட்லர். ஹிட்லரின் வலதுகரமாகத் திகழ்ந்தது, ஹிம்லர். ராணுவத்தை நேசநாடுகளின் படைகளின்மீது ஏவியதுமட்டும் ஹிட்லருக்குப் போதவில்லை. ஆகையால், ஒரு கொடூர சக்தியைப் பயன்படுத்த முடிவு செய்தான்.

Cut to . .

இருபதாம் நூற்றாண்டின் ஆரம்ப வருடங்கள். ரஷ்யா. ஸார் மன்னர் இரண்டாம் நிகலஸின் ஆட்சி. இளவரசர் அலெக்ஸி நிகலாவிச்சின் உடல்நலம் கடுமையாகப் பாதிக்கப்பட்டுக் கிடந்தது. அவருக்கு இருந்தது, ஹீமோஃபீலியா என்ற நோய். இந்நோய் இருப்பவர்களுக்கு, காயங்களிலிருந்து ரத்தம் வெளிப்படுகையில், உறையும் தன்மையை இழந்துவிடும். ஆதலால், ரத்த இழப்பு அதிகரிக்கும். எனவே, அலெக்ஸி, அரச குடும்பத்தினரால் வெகுவாகப் பாதுகாக்கப்பட்டார். எங்காவது சிறிதாக இடித்துக்கொண்டால்கூட ரத்தம் வெளிவந்துவிடும் வாய்ப்பு இருந்ததால், எங்குமே அவரை வெளியே அனுப்பாமல், அரண்மனைக்குள்ளேயே வைத்திருந்தனர். அதேசமயம், அரசி அலெக்ஸான்ட்ரா, இவ்வியாதியைக் குணமாக்கும் மருத்துவர்களைத் தேடியலைந்தபடியே இருந்தார். இச்செய்தி, சைபீரியாவில் அலைந்துகொண்டிருந்த ஒரு மனிதனின் செவிகளை எட்டியது.

அம்மனிதனை, அவனைச்சுற்றி இருந்தவர்கள், பயம் கலந்த மரியாதையுடனே அதுகாறும் நடத்தி வந்தனர். திடீரென்று தன்வசம் இருக்கும் அமானுஷ்ய சக்தியினால் அவன் எதையாவது செய்துவிடுவானோ என்பதே அவர்களின் பயத்துக்குக் காரணம். அதேசமயம், அவனிடம் சென்றால், தனது வழிபாட்டினால், தீராத நோய்களையும் அவன் குணமாக்கிவிடுவான் என்றும் மக்கள் நம்பினர். இப்படி, ஒரு புதிராகவே வாழ்ந்துகொண்டிருந்த அம்மனிதனது பெயர். . .

க்ரிகோரி எஃபிமாவிச் ரஸ்புடீன்.

ரஷ்ய ஸார் குறிப்புகளின்படி, அரசி அலெக்ஸான்ட்ரா ரஸ்புடீனைப்பற்றிக் கேள்விப்பட்டதும், அவரை அழைத்ததாகத் தெரிகிறது. அரசியின் அழைப்பை ஏற்று அரண்மனை சென்ற ரஸ்புடீன், இளவரசன் அலெக்ஸியைப் பெருமளவு குணப்படுத்தியதாகவும் தெரிகிறது. ஒவ்வொரு முறை அலெக்ஸி காயமுறும்போதும், அவனருகில் சென்று அமர்ந்துகொள்ளும் ரஸ்புடீன், கண்களை மூடிக்கொண்டு, பலமணிநேரம் கட்டையைப் போல் அமர்ந்திருந்ததாகவும், மெதுவே இளவரசனின் ரத்தப்போக்கு நின்றதாகவும் குறிப்புகள் தெரிவிக்கின்றன. இதனால், வெகுவிரைவிலேயே அரசகுடும்பத்தினரின் அன்புக்கும் மரியாதைக்கும் பாத்திரமானார் ரஸ்புடீன். இங்கே ஒரு செய்தி என்னவெனில், ஆரம்பத்தில் அரசியின் அழைப்பு கிடைத்தவுடன், தனது மரணம் நெருங்குவதாக சைபீரியாவில் இருந்த சில நண்பர்களிடம் ரஸ்புடீன் சொன்னதாகவும் ஒரு தகவல் உண்டு.

செய்ன்ட் பீட்டர்ஸ்பெர்க் நகரின் செல்வந்தர்களிடையே, ரஸ்புடீனின் பெயர் வெகுவாக அடிபட ஆரம்பித்தது. பணக்கார வீட்டுப் பெண்கள் ரஸ்புடீனை சந்தித்த வண்ணம் இருந்தனர். அவர்களைத் தவறாகப் பயன்படுத்தவும் ஆரம்பித்தார் ரஸ்புடீன் என்று அறிகிறோம். இக்காலத்தில், முதல் உலகப்போர் நிகழ்ந்தது. உடல்நலக்குறைவில் இருந்த ஸார் மன்னர் நிகலஸ், ரஸ்புடீனால் தைரியம் சொல்லப்பட்டு, யுத்தமுனைக்குப் பயணமானார். அதன்பின் அரசிக்கும் ரஸ்புடீனுக்கும் இருந்த உறவின் நெருக்கம் அதிகரிக்கவும் தொடங்கியது. குடித்துவிட்டு, தனது முக்கியத்துவம் பற்றி மதுக்கூடங்களில் உளறினார் ரஸ்புடீன். இது, அரசகுடும்பத்தின் காதுகளை எட்டியது.

அரசகுடும்பத்தின் பிரபுக்களில் ஒருவராக இருந்த ஃபெலிக்ஸ் யுசுபோவ், ரஸ்புடீனின் செல்வாக்கினால் கோபம் கொண்டார். டிமிட்ரி பாவ்லோவிச் என்ற தனது நண்பருடனும், வ்ளாடிமிர் புருஷ்கேவிச் என்ற மற்றொரு அரசியல்வாதி நண்பருடனும், ஒரு திட்டம் தீட்டினார். அதன்படி, பாவ்லோவிச்சும் புருஷ்கேவிச்சும் ரஸ்புடீனை விருந்து ஒன்றுக்கு பிரபு யுசுபோவ் அழைப்பதாகக் கூறி, அவரது அரண்மனைக்கு அழைத்து வந்தனர். அங்கே, நிலவறையில், ஐந்து பேரைக் கொல்லத் தேவையான அளவு சயனைட், கேக்குகளில் கலக்கப்பட்டு ரஸ்புடீனுக்காகக் காத்திருந்தது. அதை எந்தச் சந்தேகமும் இல்லாமல், முழுமையாகச் சாப்பிட்டார் ரஸ்புடீன். மிகக்கொடுமையான அளவு சயனைடாக இருந்தும், ரஸ்புடீனுக்கு எதுவுமே ஆகவில்லை. இவர்களுடன் சிரித்துப் பேசியவண்ணமே இருந்தார். பதற ஆரம்பித்த யுசுபோவ், நிலவறையில் இருந்து மாடிக்குச் சென்று, தனது ரிவால்வரை எடுத்து வந்தார். ரஸ்புடீனின் முதுகிலும் சுட்டார். ரஸ்புடீன் அலறியபடி கீழே விழுந்ததும், இந்த மூவர் குழு, அரண்மனையை விட்டு அகன்றது. சிறிதுநேரம் கழித்து நிலவறைக்கு மறுபடி வந்த இவர்கள், ரஸ்புடீன் திடீரென்று கண்களைத் திறந்ததையும், யுசுபோவின் மீது பயந்ததையும் கண்டு, மறுபடி மூன்று முறை ரஸ்புடீனைச் சுட்டதாகத் தெரிகிறது. அப்படியும் சாகாத ரஸ்புடீன், தள்ளாடியபடியே தங்களை நோக்கி நடந்து வந்ததைப் பார்த்த அவர்கள், தங்கள்வசம் இருந்த பிரம்புகளால் ரஸ்புடீனைப் பலம் கொண்ட மட்டும் தாக்கினர். படுமோசமாகச் சிதைக்கப்பட்டபின்னரும், ரஸ்புடீன் சாகவில்லை. எனவே, அவரை ஒரு பெரிய துணியில் கட்டி (அதற்கு முன்னரே ரஸ்புடீனின் பிறப்புறுப்பை வெட்டியாகிவிட்டது), அருகில் இருந்த நேவா ஆற்றில் வீசினர்.

மூன்று நாட்கள் கழித்து ரஸ்புடீனின் உடல், ஆற்றில் கண்டெடுக்கப்பட்டது. அவரது கரம், உலகுக்கு ஆசி கூறுவதைப் போல் உயர்ந்திருந்ததாகவும் அறிகிறோம். பிரேதப் பரிசோதனையின்போது, ஆற்றிலும் ரஸ்புடீன் சாகவில்லை என்பதும், சிறுகச்சிறுகத் தண்ணீர் நுரையீரலில் புகுந்ததனால், மூச்சுத்திணறியே இறந்திருக்கிறார் என்பதும் கண்டுபிடிக்கப்பட்டது. மிக அதிக அளவு சயனைட் அவர் வயிற்றில் இருந்ததும், அவரது உடலில் பல துப்பாக்கிக்குண்டுகள் இருந்ததும்கூட கண்டுபிடிக்கப்பட்டன. ஒரு ரகசிய இடத்தில் அவரது உடல் புதைக்கப்பட்டது. அந்த ஆண்டு – 1916. (பின்னாட்களில் அவரது உடல், சில புரட்சியாளர்களால் தோண்டியெடுக்கப்பட்டு, எரிக்கப்பட்டது).

Cut to . .

ஹிட்லர். தனது வலதுகரமான ஹிம்லர் சொன்ன ஒரு தகவல், ஹிட்லரின் முகத்தில் இளிப்பை வரவழைத்தது.

ஆண்டு – 1944 . ஸ்காட்லாந்தின் டார்மகன்ட் தீவு. நாஜிக்களின் கொடூர ஆப்ரேஷன் ஒன்றைத் தடுத்து நிறுத்துமாறு அமெரிக்க கமாண்டோ படை ஒன்றுக்குக் கிடைத்த தகவலை வைத்து, கமாண்டோ படை இத்தீவுக்கு வருகிறது. அவர்களுடன், அமானுஷ்ய சக்திகளைப் பற்றி ஆராயும் ட்ரெவர் ப்ரட்டன்ஹோம் என்ற இளைஞனும், சிந்தியா ஜோன்ஸ் என்ற மீடியமும் வருகின்றனர். சிந்தியா, அங்கே கொடூர நிகழ்வு ஒன்று நடக்கப்போவதாகச் சொல்கிறாள்.

அந்த இடத்தில், ரஸ்புடீன் நின்றுகொண்டிருக்கிறான்.

நரகத்தைச் சேர்ந்த கொடிய தெய்வங்களான ஓக்ரு- ஜஹாத் என்ற ஏழு பேய்களை பூமிக்கு வரவழைப்பதே அவனது லட்சியம். இதன்மூலம், ஹிட்லருக்கு வெற்றி கிடைக்கும் (ஆனால், அதன்பின் அவை ஹிட்லரையே கொன்றுவிடும் என்பது ஹிட்லருக்குத் தெரியாது). திடும்மென ஒரு ஒளிவெள்ளம். பேரிடியைப் போன்ற சத்தம்.

அங்கே . .

சிகப்பு வண்ணத்தில், சிறிய குரங்குக் குட்டியைப் போல ஒரு ஜந்து.

அந்த ஜந்தை, ட்ரெவர் ப்ரட்டன்ஹோம் தூக்கிக்கொண்டு வந்துவிடுகிறான். ரஸ்புடீனின் முயற்சி தோல்வியுற்றது என்று அனைவரும் எண்ணுகிறார்கள். ஹிட்லர் இறக்கிறான்.

ஐம்பது வருடங்கள் கழித்து . . .

1994 . இரண்டு வருடங்களாகத் தொலைந்துபோயிருந்த ட்ரெவர் ப்ரட்டன்ஹோம் – தற்போது, Bureau for Paranormal Research and Defense (சுருக்கமாக B .P .R .D ) என்ற அமைப்புக்குத் தலைவர் – திடீரென அவரது அலுவலகத்தில் அமர்ந்துகொண்டிருப்பதைக் காண்கிறோம். தனக்குத்தானே பேசிக்கொண்டும் புலம்பிக்கொண்டும் இருக்கும் அவரிடம், ஒரு குரல் , பேசுகிறது. மெல்ல, அந்த உருவம், இருட்டிலிருந்து வெளியேயும் வருகிறது.

ஹெல்பாய்.

பெரிய உருவம். தலையில் இரண்டு வெட்டப்பட்ட கொம்புகள். கல்லால் ஆன வலது கை. குரங்கைப் போன்ற முகம். பெரிய வால். உடற்பயிற்சியால் முறுக்கேறிய உருவம்.

இரண்டு வருடங்களுக்கு முன்னர், ஆர்க்டிக் காண்டத்துக்குச் சென்ற தனது பயணத்தை விவரிக்க ஆரம்பிக்கிறார் ட்ரெவர். அங்கே, ஒரு குகையினுள், பெரியதொரு சிலை இருந்ததையும், அந்தச் சிலையின்முன்னர், ஒரு மனிதனின் சிலையைப் பார்த்ததாகவும், அந்தச் சிலையைத் தொட்டபோது, அது உயிர்ப்புடன் இருந்ததைக் கண்டதாகவும் சொல்லும் ட்ரெவர், அதன்பின் எதுவும் நினைவில்லையென்று புலம்புகிறார்.

அப்போது அந்த அறையில் பல தவளைகள் பிரவேசிக்கின்றன. கூடவே . . . . .

இதுதான் Hellboy: Seed of Destruction காமிக்ஸின் துவக்கம்
.

இதன்பின் என்ன நடக்கிறது என்பதைக் காமிக்ஸைப் படித்துத் தெரிந்துகொள்ளுங்கள்.

இந்தக் காமிக்ஸை வைத்து, 2004 ல் Hellboy என்று ஒரு திரைப்படம் வந்ததை நண்பர்கள் அறிந்திருப்பீர்கள்.. அந்தத் திரைப்படத்தை இதுவரை பார்த்திருக்கவில்லை என்றால், பார்க்க முயலவும். விறுவிறுப்பாகச் செல்லும் action படம் அது. அதில் ஹெல்பாயாக நடித்திருப்பவர், ரான் பேர்ல்மன். படத்தை இயக்கியது, கியர்மோ டெல் டோரோ.

ஹெல்பாய் காமிக்ஸைப் பொறுத்தவரையில், அமானுஷ்ய சக்திகள் – அவைகளை எதிர்த்துப் போராடும் ஹெல்பாயும் அவனது குழுவும் – என்ற வகையில் கதைகள் எழுதப்பட்டிருக்கும். கதையினூடே அட்டகாசமான அதிரடி சண்டைகள் நிரம்பியிருக்கும். ஹெல்பாயின் அணியில் இருக்கும் மற்றவர்கள் – ஏப் ஸாஃபியன் மற்றும் எலிஸபெத்.

Hellboy முதல் பகுதியின் ட்ரெய்லர் இது.

Hellboy II: The Golden Army படத்தின் ட்ரெய்லர் இது. Rammstein குழுவினரின் அட்டகாசமான பாடல் – Mein Herz Brennt , இந்த ட்ரெய்லரின் பின்னணியில் வரும். எனக்கு மிகப் பிடித்தமான ட்ரெய்லர்கலில் இதுவும் ஒன்று. இந்தப் பாடலுக்காகவே.

Hellboy: Sword of Storms அனிமேஷன் படத்தின் ட்ரெய்லர்.

Hellboy: Blood and Iron அனிமேஷன் படத்தின் ட்ரெய்லர்.